Klêi kơ’nâi môi khế pêi pro troăng pêi khu râ kăn pơkuâ péa râ, Dak Lak nếo mơnhên troăng prôk rĕng ‘na xúa khoa hok – kŏng ngê̆, tơdrêng amê xuân trâm ƀă kơtăn kân pơla mâu cheăm, bêng tung tơdroăng pơhlêh xúa kŏng ngê̆ ƀă pơhlêh pro mơ-éa. Kong pơlê hiăng pêi kêi đeăng 96 hnoăng cheăng tiô tro Tơdroăng pơkâ 71 dêi Chin phuh, tơdrêng amê djâ tung tơdroăng pêi cheăng hneăng hôp mơ’no tơdrêng tung um troh tâi tâng 102 cheăm, bêng ƀă tơdjêp camera séa ngăn a tíu xiâm pơkuâ tơnêi têa mâu kong pơlê.

Laga, ki nhât khât ăm hlo ‘’tíu ki kât krá’’ kơmăi kơmok kŏng ngê̆ a Dak Lak xuân tá hâi châ tơdâng tơ’mô. Hên cheăm xuân tá hâi ai kơmăi ƀok kơxô̆, cho tơmeăm ki pơklât tiô pơkâ. Chêng lêng ‘na kơxô̆ hô sơ tung troăng măng pơla mâu cheăm, bêng cho kân; ai tíu bu tơdah châ 3 – 5 hô sơ rêm hâi. ‘Na mơngế pêi cheăng, iâ kăn ƀô̆ râ cheăm, bêng châ hnê mơjiâng trâu hơngế ‘na kŏng ngê̆ thông tin.

Nôkố kong pơlê Dak Lak dế mơjiâng péa tơdroăng tơkêa bro ‘na mơnhông khoa hok – kŏng ngê̆, pơhlêh nếo tơmiêt pêi rơkê ƀă pơhlêh xua kŏng ngê̆ lâp kong pơlê vâ pro tơdroăng xiâm vâ rak vế ƀă mơnhông ăm hneăng mơnhông la ngiâ. Tơdrêng amê, kong pơlê xuân thăm séa ngăn, rah xo mơngế pêi cheăng tơtro vâ tơniăn kâi pôu râng hnoăng cheăng, hnoăng cheăng nếo tung troăng pêi khu râ kăn pơkuâ pơlê pơla péa râ.