Tơdế apoăng hơnăm kố, tâi tâng tơmeăm pêi lo dêi kong pơlê (GRDP) Dak Lak tâk lối 7%. Tâi tâng kơxô̆ liăn ngân tơnêi têa tung kong pơlê châ lối 8.700 rơtal liăn, tâk 1/3 tâng vâ pơchông ƀă hơnăm nah. Tiô pôa Tạ Anh Tuấn, Kăn hnê ngăn Vi ƀan kong pơlê Dak Lak, tung la ngiâ cho pơkâ ki “mơdêk ăm tâk, pêi tơƀrê’’ vâ kong pơlê pêi châ tiô pơkâ tâk 8% tung plâ hơnăm 2025.

Kăn hnê ngăn Vi ban kuăn pơlê dêi kong pơlê pơkâ thế: Xo liăn ngân ăm hơnăm kố thế tâk iâ gá 20% tâng vâ pơchông ƀă tơdroăng tối hdrối, thế kơdĭng hrê rêm hâi. Mơdêk xo liăn ngân ‘no mơjiâng tơmeăm khoăng tơnêi têa, malối mâu tơdroăng tơkêa bro ki kal, mâu tơmeăm khoăng a cheăm - bêng klêi tơ’mot. Tơkŭm tah mâu tơdroăng tơkêa pro hrá pêi, ‘mâi pêi tơbrê kơxô̆ liăn ‘no mơjiâng tơmeăm khoăng. Mơnhông tơdâng kơpong têa kơxĭ - kong ngo, ƀă tơdroăng kring vế kong, mơnhông păn ká xi xŏng, ‘mâi mơnhông cheăng kâ krá tơniăn ăm kuăn pơlê ối kĭng têa kơxĭ ƀă kong ngo;  Mơdêk rĕng tơdroăng têa tah hngêi pơtân, hngêi xi kơchoh, pro  hngêi kum mâu kơtiê klêi hdrối hâi lơ 30/8/2025.