Kố cho mâu tơmeăm khoăng ai tâi tâng kơxô̆ ‘no pro chât rơpâu rơtal liăn, tơhrâ kô tơƀrê cheăng ƀă kơmăi kơmok ƀă logistic ăm Tây Nguyên  ƀă Nam Trung bô̆.  Tung mê tơdroăng Tơkêa bro ‘no liăn mơjiâng ƀă mơdró mâu tơmeăm khoăng kơmăi kơmok Hoà Tâm - pơla rôh má 1 ai xúa tơnêi dâng 492 ha; tâi tâng kơxô̆ liăn ‘no dâng 4.200 rơtal liăn.

Tơdroăng tơkêa bro tơmeăm khoăng  pro tơdrêng ăm kơpong mơjiâng meăm thep Hòa Phát ai ivá  pro 6 rơtuh tâ̆n/hơnăm, tâi tâng kơxô̆ liăn ‘no mơjiâng pro dâng 48.000 rơtal liăn. Tơdroăng tơkêa bro  ‘no liăn mơjiâng kơno tuk Bản Gốc, ai tâi tâng kơxô̆ liăn ‘no dâng 16.300 rơtal liăn. Péa tơdroăng tơkêa bro mê xua Grup Hoà Phát ‘no liăn pro.

Pakĭng mê, Dak Lak xuân pơxiâm pro kơpong hngêi kơmăi ki dâi lĕm a bêng Hoà Hiệp xua grup N ƀă G ‘no liăn ƀă pro kân lối 250 ha, tâi tâng liăn ‘no pro vâ chê 2.400 rơtal liăn. Mâu tơdroăng tơkêa bro mê xua pêi cheăng kô tơbleăng troh lâp lu mơnhông mâu kơvâ tê mơdró dêi kong pơlê Dak Lak, gum ăm chât rơpâu ngế ai cheăng pêi a kong pơlê.