A tíu pêi cheăng mơjiâng pro troăng kân dêi cheăm tơdjêp Ea Wer ƀă Ea Ñuôl, kong pơlê Dak Lak, kŏng nhân dế krâ kơnâng, tâp trăng pakĭng troăng, sơng troăng kân... vâ kêi đeăng mâu tơmeăm ki má mơ’nui, rĕng djâ troăng kân chiâng xúa. Pôa Trần Anh Dương, Kăn pơkuâ Kŏng ti pêi cheăng tiô rơnó môi khu pro Kông troăng Dương Hiền (cheăm Ea Ñuôl, kong pơlê Dak Lak) tối ăm ‘nâi, tơdroăng tơkêa bro xŏn 3,9 km, tâi tâng kơxô̆ liăn mơ’no 18,5 rơtal liăn, xua tơdjêp pái ngế tơdah xo hnoăng pro tơmeăm pêi pro, hâi khế pêi pro sap ing khế 2/2024 troh khế 9/2025.

Nôkố kơxô̆ liăn pro tơmeăm xua khu tê mơdró pơkuâ hiăng kêi đeăng 95% kơxô̆ tơdroăng cheăng. Laga, kơxô̆ liăn mơ’no cheăng ăm khu tê mơdró ối iâ, tơdrêng amê tơdroăng mơjiâng pro xuân thế châ tơniăn. Pôa Dương tối:

‘’Tơmeăm troăng cheăm kố pro ing khế 2 hơnăm 2024 troh nôkố, laga nôkố nếo mơ’no liăn châ 2,5 rơtal liăn tung tâi tâng kơxô̆ liăn 8,5 rơtal liăn. Nôkố tơmeăm hiăng vâ pêi kêi đeăng, bu u ối to lâi tơmeăm ki kŭn môi tiah tâp trăng pakĭng, môi iâ kơpong kơnâng... Troăng kân klêi mê liăn mơ’no tá hâi tơxâng to lâi, ngin thế lăm mung vâ pro, môi khế nếo tâi hơp đong mê ôh tá châ chêl liăn cho pá puât ‘nâng’’.

Tung pơkâ pêi mơ’no liăn cheăng tơnêi têa hơnăm 2025, tơring Ƀuôn Đôn (ton) châ kong pơlê Dak Lak xing xoăng 106 rơtal liăn vâ chêl liăn chĕn mâu tơmeăm pơtó ing hơnăm hdrối ƀă pêi pro nếo mâu tơdroăng tơkêa bro troăng klông, mơjiâng tíu pêi cheăng tơnêi têa, troăng klông plông hngêi trung, hngêi pơkeăng cheăm tung hơnăm kố. Pôa Cao Ngọc Duy – Kăn pơkuâ Khu pơkuâ tơdroăng tơkêa bro tơring Ƀuôn Đôn (ton) tối ăm ‘nâi, troh nôkố, tíu pêi cheăng nếo mơ’no liăn châ 40 rơtal liăn, châ 39% pơkâ pêi.

Pôa Duy tối ăm ‘nâi tơ’nôm, tơdroăng mơ’no liăn ngân hiăng hrá sap apoăng hơnăm ƀă sap ing hâi lơ 1/7 troh nôkố pơtối tro pơtê.

“Tung tơdroăng tơmot chiâng môi sap ing hâi lơ 1/7, cho thế pơtroh pêi cheăng a Khu pơkuâ liăn ngân vâ pơkuâ. Laga, troh nôkố tá hâi vêh xing xoăng ăm khu mơ’no liăn cheăng, xua mê tơdroăng mơ’no liăn ngân pơtê tơdrêng tơdroăng tơmot chiâng môi troh nôkố, mâu khu mơ’no liăn cheăng ôh tá chêl liăn. Tá drêng pơkâ pêi kơxô̆ liăn hiăng châ xing xoăng, laga ôh tá ai pơkâ pơcháu ăm khu mơ’no liăn cheăng mê ngin xuân ôh tá chiâng vâ mơ’no liăn. Pakĭng mê, xua tơmot chiâng môi péa râ, mơngế pêi cheăng péa râ dêi Khu pơkuâ tá hâi châ kêi đeăng tâi tâng, tăm pŏng tá hâi ai, chiâng ai tơdroăng mơ’no liăn troh nôkố iâ tâ tâng pơchông ƀă mâu hơnăm hdrối’’.

Pôa Trương Công Thái, Phŏ Kăn hnê ngăn Vi ƀan kong pơlê Dak Lak, tối klêi kơ’nâi kong pơlê pêi pro tơmot chiâng môi ƀă tah lôi râ tơring sap hâi lơ 1/7, tâi tâng mâu Khu pơkuâ tơdroăng tơkêa bro râ tơring thế troh pêi cheăng ối tung 3 Khu pơkuâ tơdroăng tơkêa bro râ kong pơlê ƀă nôkố dế rah bro chiâng mâu khu kơpong. Tơdroăng kố toi tiô tơdroăng pơhlêh tăm pŏng, pro ôh tá tơniăn ‘na mơngế pêi cheăng, tơdrêng amê thế vêh kĭ tai khoăn, hiăng tơdjâk troh tơdroăng mơ’no liăn ngân ăm tơnêi têa, ăm mâu tơdroăng tơkêa bro mơjiâng tơmeăm ki xiâm.

Pôa Trương Công Thái tối ăm ‘nâi, hdrối tơdroăng mê, Vi ƀan kong pơlê hiăng hnê mơhno kơtăng tơdroăng kêi đeăng tâi tâng khu tơrŭm cheăng, mơdêk rĕng pro mơ-éa pơhlêh tăm pŏng ƀă pêi pro xing xoăng râ inhên tung mơ’no liăn cheăng tơnêi têa:

“Troh nôkố ‘na ki xiâm mâu khu cheăng dêi tơring hdrối nah pơtroh a râ kong pơlê mê hiăng kêi đeăng pong rơgi pơhlêh tăm pŏng, kĭ tai khoăn ƀă pêi kêi đeăng mơngế pêi cheăng. Tiah mê, mơ’nui khế 9 kố kô mơdêk tơdroăng vêh tơ’nôm kơxô̆ liăn tá hâi mơ’no liăn cheăng mê pơla kố nah hrá. Tơdrêng amê ngin xuân pơkâ mâu khu mơ’no liăn cheăng, khu mơ’no liăn cheăng thâ pro hô sơ chêl kơxô̆ tơmeăm mơjiâng pro hdrối mê vâ xo tơvêh pơtân xo hdrối, rak tơniăn tơdroăng mơ’no liăn ngân ƀă tŏng gum khu tơdah xo hnoăng pro tơmeăm ai kơxô̆ liăn pơtối mơjiâng pro’’.

Pakĭng tah lôi mâu tơdroăng ki tá tŭm tam pŏng chiâng hrá mơ’no liăn, Dak Lak xuân thăm hnê pơtâp - xing xoăng hnoăng pơla mâu tíu cheăng, kong pơlê. Tiô pôa Huỳnh Gia Hoàng, Phŏ Kăn pơkuâ Khu pơkuâ liăn ngân kong pơlê Dak Lak, drêng nhên tơdroăng cheăng, nhên hnoăng cheăng dêi rêm khu cheăng, rêm kơ koan tíu cheăng, mê tŭm 2 tơdroăng tơvâ kân ‘na mơ’no liăn ngân ƀă tăng ƀăng tơnêi a kong pơlê, pơrá châ rak tơniăn hên:

“Thế mơnhên ‘nâng, kăn ƀô̆ mâu cheăm ai tơdroăng ki ôh tá ‘nâi pro ti lâi. Xua mê mâu khu râ, kơvâ cheăng hiăng po mâu lâm hnê mơhno vâ mơnhên inhên hnoăng cheăng pơla mâu rêm pâ ƀă ối tung hnoăng dêi kơbố ối chĕn lơ kong pơlê vâ pêi pro. Ing mê, drêng châ pơtâp mê nôkố mâu kăn ƀô̆ hiăng ‘nâi tơdroăng cheăng, hnoăng cheăng, hnoăng tung mơ’no liăn ngân mơ’no liăn cheăng tơnêi têa ƀă tá tăng ƀăng tơnêi’’.

Drêng mâu tơdroăng ki tơvâ ‘na khu cheăng, mơngế cheăng, pro mơ-éa ƀă hnoăng rêm tơdroăng châ rơnêu, kơxô̆ liăn mơ’no kô châ rak tơniăn, pro tơdroăng ki hâk ro ăm mâu tơmeăm pro, tơdroăng tơkêa bro pêi kêi đeăng tro pơkâ. Kố xuân cho troăng kơteăng ki kal vâ Dak Lak mơdêk mơjiâng hngêi trăng troăng klông, kum mơnhông cheăng kâ - rêh ối pơlê pơla krá tơniăn tung pơla klêi kơ’nâi tơmot chiâng môi.