20 to cheăm châ rah xo tung 51 to cheăm kơtiê xơpá ó má môi dêi kong pơlê Dak Lak. Tung mê, ai 14 to cheăm ai sap 7 tơdroăng pơkâ kơtiê xơpá tơngi klêng, hên tơdroăng xơpá ‘na tơmeăm khoăng, pêi chiâk ƀă mơdró kâ ki kal. Tơdroăng tơkêa bro ai pơkâ troh hơnăm 2030, rêm to cheăm ai iâ môi túa cheăng kâ ngiât krúa lơ pơ’lêh tung cheăng kâ, môi khu tơrŭm pêi cheăng kâ, uâ pơliê pro kế tơmeăm pê lo ƀă tê kế tơmeăm; rơtế ƀă mơnhông cheăng kâ hlối rak túa lĕm tro, mơnhông tơdroăng rêh ối.

Tiô tơdroăng kal vâ dâng 5.000 rơtal liăn, mê ai dâng 3.000 rơtal liăn mơhnhôk tăng tung kong pơlê ƀă pơ’lêh tơdroăng rêh ối, dâng 2.000 rơtal liăn xo ing hngêi rak liăn kong pơlê. Tơdroăng xoăng liăn vâ pêi cheăng ngăn tiô kơ tơdroăng pro tơdâng liăn ngân ƀă kơxô̆ liăn mơhnhôk tăng tro luât.

A rôh hôp, kăn hnê ngăn mâu kơvâ cheăng ƀă kăn teăng mâ mâu cheăm pâ thế tăng troăng hơlâ vâ tơdroăng pêi pro mê rĕng châ tơbleăng pêi. Pôa Nguyễn Duy Tính, Kăn hnê ngăn Vi ƀan kuăn pơlê cheăm Phú Mỡ, kong pơlê Dak Lak pâ thế rĕng hnê mơhno pêi ‘na tơdroăng cheăng ki ai chêh pêi ahdrối ƀă troăng hơlâ pêt tơdjuôm ƀă kơxô̆ liăn vâ hbrâ ‘no liăn pêi pro tung apoăng hơnăm 2027.

“Tơmâng mơjiâng pro tơmeăm khoăng, mê pro tíu mơ’no têa ăm mâu thôn hdroâng kuăn ngo. Tơmâng mơjiâng pro mâu kơpong klâ kuăn pơlê ối hơngế iâ a mâu thôn kuăn ngo rêh ối. Hbrâ mâu tíu pêi cheăng khu râ pơkuâ, mâu hngêi trung, malối hngêi trung ai tíu kâ koi pơtê ăm hok tro kuăn ngo” .

Tung pơla mê, Khu hnê ngăn Kuăn ngo ƀă Loi tĭng tiô khôp kong pơlê Dak Lak pâ thế mâu cheăm rah xo tơdroăng cheăng tơtro ƀă tơdroăng kal vâ, pơtói rak ki hlâu ‘na pêi cheăng, tơdroăng cheăng pêi tiô hmâ pêi ing ton nah ƀă ôm hyô rơtế mơhno túa lĕm tro. Rêm tơdroăng cheăng thế hbrâ troăng hơlâ pêi vâ pơtối rak vế klêi kơ’nâi kơjo kum.

Tối mơgêi a rôh hôp, pôa Y Nhuân Byă, Phŏ kăn hnê ngăn Vi ƀan kuăn pơlê kong pơlê Dak Lak, pơkâ thế mâu tíu pêi cheăng, kơvâ cheăng ƀă mâu cheăm bêng mơnhên tơdroăng cheăng, tơdroăng pêi pro tơrêm hơnăm, tơrŭm ƀă mơ’no liăn cheăng, ví pêi hên, tơvâ tơvân pơla mâu tơdroăng cheăng. Ki hdrối, tơmâng mâu tơdroăng pêi pro tung hơnăm 2027, pêi ahdrối cho tơmeăm khoăng ki kal.

“Tơrŭm pêi tơdroăng ki hiăng chêh hbrâ hdrối ƀă mơnhông cheăng kâ, hên túa mâu tơdroăng pêi pro, malối cho mơdêk pê lo liăn, mơnhông tơdroăng rêh ối kuăn pơlê. Tiah mê, kơxô̆ rơpŏng kơtiê xuân cho môi tung mâu tơdroăng pơkâ ki kal má môi. 20 to cheăm châ rah xo mê kal thế hbrâ séa ngăn nhên hdrối, thế ‘nâi nhên tơdroăng kal vâ ki klâi klêi mê pâ thế tơtro”.