A bêng Ƀuôn Ma Thuột po rôh trâm mâ tơdjêp tê mơdró khu mơdró kâ Dak Lak – Sinuâ, vâ mơnhông trâu hơngế tơrŭm cheăng tê mơdró tơmeăm pêi lo ing chiâk deăng Việt Nam – Sinuâ, malối cho tung kơvâ plâi sầu riêng.

A rôh hôp, mâu kăn hiăng tơpui tơno, tơpui tối leăng nhên tơdroăng púi vâ dêi kơchơ mơdró tê kơchâi plâi, malối cho sầu riêng a Sinuâ. Hơnăm 2024, plâi sầu riêng Việt Nam tê ngi Sinuâ châ 736 rơpâu tâ̆n, tâk vâ chê péa xôh tâng vâ pơchông ƀă hơnăm hdrối. Tiô mâu khu mơdró kâ Sinuâ, pakĭng ki tơ’lêi hlâu sap ing Khu tơrŭm mâu Kong têa Cheăng kâ Tŭm têk Kơpong, “Tơdroăng ki tơ’lêi” tíu tơkăng kong Việt Nam – Sinuâ hiăng gum rak tơniăn rĕng, tơdroăng púi vâ tê dêi kuăn pơlê tâk hên mê ki pơxúa ‘na kơpong pêt, ki lĕm dêi plâi tơniăn ƀă kơxô̆ plâi tê gá tâk hên tâ tá plâ hơnăm hiăng gum tung tơdroăng mơnhông dêi kơvâ sầu riêng Việt Nam a Sinuâ.

Mâu tíu pêi cheăng, khu mơdró kâ Việt Nam xuân tối ‘na túa pơkâ, kơchơ mơdró sầu riêng. Mâu kăn tối rơhêng vâ mơjiâng mâu tíu tơrŭm pêt, rak vế tơniăn túa pơkâ tơkŭm kí sap ing apoăng ƀă tơngah ‘na tíu tê tơniăn, ai tíu tê nhên. Rôh kố, kăn teăng mâ mâu tíu pêi cheăng rơtế kĭ tơkêa mơéa chôu vế tơrŭm cheăng tung kơvâ tê sầu riêng ngi kong têa ê. Khu tơrŭm mâu khu mơdró kâ kong pơlê Dak Lak rơtế ƀă khu mơdró kâ Sinuâ hiăng kĭ mơjiâng Tíu tê plâi ASEAN châ pro a kong pơlê Dak Lak.