Dak Lak tơkŭm tah lôi tíu kreăng, mơdêk mơnhông cheăng kâ – rêh ối pơlê pơla
Thứ tư, 05:00, 28/05/2025 Tơplôu: A Sa Ly/VOV Tơplôu: A Sa Ly/VOV
VOV.Xơ Đăng - Tiô mơnhên a hneăng hôp dêi Khu pơkuâ hnê ngăn cheăng Đảng kong pơlê Dak Lak, tung 5 khế hiăng hluâ, cheăng kâ – rêh ối pơlê pơla dêi kong pơlê pơtối rak tơniăn ƀă ai troăng mơnhông châ tơƀrê hôm.

Tâi tâng mâu kơvâ pơrá mơnhên kơlo tơtêk hôm tâng pơchông ƀă roh kố hơnăm hdrối. Kơlo mơjiâng tơmeăm kơmăi kơmok tiô tối hdrối tâk lối 20%; tâi tâng kơlo tê ‘ngré tơmeăm ƀă pêi lo liăn tê mơdró châ lối 10 rơpâu rơtal liăn; Xo hnoăng liăn ngân tơnêi têa châ lối 4.900 rơtal liăn. Tơdroăng pêi tê tơmeăm ngi kong têa ê, mơ’no liăn cheăng, khôi túa lĕm tro – ôm hyô ƀă kum rêh ối pơlê pơla xuân châ tơƀrê hên. Tơdroăng tŏng gum mơjiâng tơmeăm khoăng, rơnêu hngêi pơtân, hngêi xi kơchoh châ pêi pro thâ, châ lối 54% pơkâ pêi.

Pakĭng mâu tơdroăng châ tơƀrê, hneăng hôp xuân tối tơdrăng tối mâu tơdroăng ối tơvâ tơvân, kơdroh môi tiah: tơtêk cheăng kâ tá hâi mơnhông khât; hên tơdroăng tơkêa bro mơ’no liăn cheăng tơnêi têa hrá pêi pro; kơxô̆ khu tê mơdró pơtê pêi cheăng xuân ối hên. A hneăng hôp, pôa Nguyễn Đình Trung, Kăn pơkuâ hnê ngăn cheăng Đảng kong pơlê Dak Lak pơkâ khu râ kăn pơkuâ mâu tơring, kơvâ cheăng tung kong pơlê hbrâ, kơtăng pêi pro mâu hnoăng cheăng hiăng pơkâ mơ’no; pro tơniăn tơdroăng ki hrá tung khu pêi cheăng klêi kơ’nâi tơmot chiâng môi tíu pêi cheăng tơnêi têa, ôh tá lôi tơdjâk troh tơdroăng cheăng tơdjuôm dêi kong pơlê.

           

 

Tơplôu: A Sa Ly/VOV

Viết bình luận

TIN CÙNG CHUYÊN MỤC

Video

Bi mni kơ Awa Hô
Đơs git oh, git bi
06/05/2025
Jreng Jrong
30/03/2024
Tanh bĕ dra hiam
22/03/2024