Tơdroăng chêh vâ Tơbleăng kal kí pơkâ mâu tơdroăng vâ pêi cheăng kâ ki kal dêi kong pơlê Dak Lak tung pơla hơnăm 2025 – 2030. Mê cho ki mơnhông cheăng kâ sap 11,% rêm hơnăm tơngi klêng; pê lo liăn tâng riên rêm ngế hơnăm 2030 châ 160 rơtuh liăn; pêi chiâk tâk 6,84% tung môi hơnăm; pêi cheăng ƀă kơmăi kơmok mơjiâng tơmeăm khoăng tâk 18,1%; ‘na mơdró tâk 11,25%.

Veăng hnê tối a hneăng hôp, pôa Đào Tấn Lộc, kăn hnê ngăn Khu kăn pơkuâ hnê ngăn Đảng hneăng hdrối dêi Phú Yên tối tiah kố mâu pơkâ mê ối hên tâ râ tâng vâ pơchông ƀă ai khât, malối  tung tơdroăng cheăng kâ rêh ối nốkô:

“Mơnhông pêi chiâk châ 6,84% tiô á tiah mê hên luâ râ, xua iâ hlo ai tiah mê, thăm nếo pêi chiâk ối kơnôm to a kong prâi ƀă kơchơ mơdró vâ rôe tơmăm, pin nôkố hâi kâi pêi pro tơdroăng mê xua mê thế hbrâ rơnáu tơmiât ngăn nhên hdrối ‘nôi. Klêi mê nếo, mơnhông pêi lo hên na cheăng ƀă kơmăi kơmok mơjiâng tơmeăm khoăng 18,1 %  vâ tối mê cho kơxô̆ ki hên. Tâng mơ-eăm mơjiâng tơmeăm khoăng kô luâ pơkâ, la pêi cheăng ƀă kơmăi kơmok pêi lo tơmeăm mê ối kơnôm a hên tâi tâng kơxô̆ liăn ‘no pêi cheăng dêi pơlê pơla”.

Khĕn kơdeăn khât tơdroăng cheăng hbrâ pêi pro dêi Tiểu ban hriêăn chêh mâu tơdroăng, pôa Cao Đức Khiêm, phŏ kăn hnê ngăn Khu kăn pơkuâ hnê ngăn Đảng kong pơlê Dak Lak tối, vâ môi tuăn ƀă 17 tơdroăng pơkâ, 5 khu tơdroăng pêi pro tăng troăng rơhlâ ƀă 3 tơdroăng pêi pro tơƀrê ki hiăng pơkâ. Laga, pôa tối nhên tơ’nôm pơkâ troăng hơlâ vâ rế ai hên mơngế pêi cheăng rơkê.

“Á hlo mâu vâi pú nếo bú tơmâng a hên to kăn ƀô̆ rak ngăn mê hâi pơkâ tơdroăng a mơngế ki pêi cheăng cho kih sư, kŏng nhân kih thuât ki pêi cheăng rơkê vâ tăng nâi plĕng na liăn pêi cheăng dêi  FDI. Má péa, cho ‘na mơjiâng tơmeăm khoăng, ngăn môi tiah ối kŭn, thế tơ’nôm nếo a pơkâ hdró pêi dêi kong pơlê Dak Lak mâu kơpong pêi chiâk, kơpong pêi hên ‘na kơmăi kơmok, ki chiâng pơ’lêh tâi tâng, pêi ôh tá pơtê”.

Hneăng hôp tơmâng xo 11 tơdroăng veăng hnê tối, mê ai 5 tơdroăng chêh tối mâu tơdroăng cheăng tung pơla pêi cheăng ƀă 6 tơdroăng veăng hnê tối tơdrêng. Tơmâng xo tơdroăng veăng hnê tối a hneăng hôp, pôa Nguyễn Đình Trung, Ngế cheăng tung tíu xiâm Đảng, Kăn pơkuâ hnê ngăn Đảng kong pơlê, Ngế pơkuâ Tiểu ban hriăn chêh mâu tơdroăng dêi Hneăng hôp Đảng ƀô̆ kong pơlê Dak Lak roh má 18 ăm ‘nâi, Tiêu ban hriê̆n chêh kô tơmâng xo klêi mê  tăng ngăn nhên mâu tơdroăng ki veăng hnê tối:

“Ngin kô tơmâng xo hên ƀă tơbleăng a mâu tơdroăng ki nhên vâ tơbleăng pơkâ Hneăng hôp, lơ pêi  ăm tơdroăng cheăng dêi mâu kăn hnê mơhno dêi rêm râ, dêi Hô̆i đong kuăn pơlê, Vi ƀan kuăn pơlê vâ tơbleăng pêi mâu tơdroăng cheăng dêi kong pơlê Dak Lak  tơtro tâ. Klêi hneăng hôp kố kong pơlê xuân vâ pơtối tơmâng xo mâu tơdroăng veăng hnê khê̆n dêi mâu kăn ƀă ngin rah ngăn nhên vâ tơmâng xo  mâu tơdroăng ki hnê tối.