Cheăm Tu Mơrông (kong pơlê Quảng Ngãi) châ mơjiâng  ing tơ’mot mâu tíu pêi cheăng dêi 2 to cheăm Tu Mrông ƀă Đăk Hà (kong pơlê Kon Tum ton). Nôkố cheăm ai 17 to thôn, 6.500 pơleăng mâ mơngế. Đảng ƀô̆ cheăm ai 26 chi ƀô̆, tung mê ai lối 300 ngế đảng viên. Klêi mâu kăn cheăm 2 râ pêi cheăng, đảng ủy cheăm tơkŭm trâm mâ mâu kăn ƀô̆, mâu ngế pơkuâ a mâu tíu pêi cheăng, mâu ngế pêi cheăng ƀă 2 tơdroăng  ki kal vâ tơbleăng: “Tơniăn tuăn ngôa, tơkŭm po- pơtối rak ki tơrŭm dêi rơpó” ƀă “Mơdêk tơƀrê tung tơdroăng cheăng pêi ăm kuăn pơlê pro rơdêi tơdroăng ‘mâi hơ’lêh pro hlá mơ-éa.

Pakĭng mê, Đảng ủy cheăm thâ hbrâ tơdroăng tơkŭm po hneăng Hôp 18, hneăng hơnăm 2025-2030 vâ pro rế tơƀrê tung mơnhông cheăng kâ - rêh ối. Pôa Võ Trung Mạnh, Kăn hnê ngăn Đảng ủy cheăm Tu Mrông, ăm ‘nâi.

“Cheăm nếo ‘nâi mơnhông pro tơmeăm khoăng, mơdró  vâ tơdah tơmối troh ôm hyô ngăn kơdrum sâm Ngọc Linh, klêi mê tơkŭm po mâu kơchô tê sâm. Cheăm xuân hiăng ‘nâi nhên mâu tíu vâ mơnhông ôm hyô tung kong pơlê, mơnhông ngăn a Đăk Chum 1. Cheăm xuân hiăng pơkâ po rơdâ pêt nhâ pơkeăng cho ki xiâm. Pakĭng sâm Ngọc Linh kô po rơdâ pêt mâu túa hdrê sâm ki ê vâ pro tơ’lêi hlâu tung pơchông ngăn, ing mê kring vế inâi sâm Ngọc Linh tung kong pơlê.

Tơdrêng ƀă tơdroăng pêi cheăng oh tá pơtê dêi mâu kăn, mâu cheăm  kơpong hơngế kong pơlê Quảng Ngãi dế mơhno ki hbrâ rơnáu hdrối, thâ pêi hbrâ pêi nhên ăm hneăng Hôp hnê mơhno dêi pôa Tô Lâm Kăn  xiâm pơkuâ hnê ngăn Đảng drêng lăm pôu pêi cheăng a kong pơlê. Mê cho pêi pro tiô pơkâ 45; mơjiâng tối tơbleăng tơdroăng kal kí, nâi nhên tơdroăng ki tơbrê, hnoăng cheăng pêi ki kal ƀă pơkâ mơnhông .

Pôa Nguyễn Đức Tuy,  Phŏ kăn hnê ngăn Tỉnh ủy kong pơlê, Kăn hnê ngăn Hô̆i đong kuăn pơlê dêi kong pơlê Quảng Ngãi ăm ‘mâi:

“Tơbleăng kal kí mơhno ki tơƀrê, mơ-eăm vâ tơbleăng pêi tung hneăng la ngiâ. Tíu mơnhông tơƀrê kân mê ki hơngế dêi cheăm nôkố thế pêi la tơdroăng cheăng pêi kân. Hlê nhên kopong ki lâi ai tơdroăng cheăng pêi ti lâi hnê tối chêh tung hlá mơ-éa tơbleăng kal kí vâ prôk tro troăng  hơlâ ki vâ mơnhông tơƀrê hlối mơnhông tơdroăng rêh ối tơmeăm khoăng  ƀă tuăn ngôa tơniăn ăm kuăn pơlê, malối cho kơpong hdroâng kuăn ngo”.

Hneăng hôp Đảng ƀô̆ mâu cheăm kong ngo Kon Tum dêi Quảng Ngãi kô cho rôh vâ mâu cheăm bêng ‘nâi nhên mâ ngăn tơdroăng cheăng pêi ki vâ mơnhông tơƀrê, rah tro tơdroăng pêi tơbrê pơtối rak ki rơdêi dé kơpong vâ pêi tơdroăng cheăng rê̆ng hlo tơƀrê, krá tơniăn tung mâu hơnăm la nếo./.