Kơxo lơ 16/10, Khu kăn Kuô̆k hô̆i kong pơlê Kon Tum po rôh trâm kuăn pơlê cho đoân viên, ngế pêi cheăng hdrối Hneăng hôp má 8, Kuô̆k hô̆i hneăng 15 vâ tơmâng xo mâu rơkong pâ thế, veăng tơpui tối tung 3 tơdroăng tơkêa Luât (‘mâi pơhlêh) tơdjâk troh tơdroăng ki kal troh hnoăng cheăng pơxúa dêi ngế pêi cheăng.

Ƀă kơxop hlá mơ-éa Luât Công đoàn (‘mâi pơhlêh) Khu kăn Kuô̆k hô̆i kong pơlê Kon Tum tơdah xo châ 6 tơdroăng pâ thế, veăng tơpui dêi đoân viên, ngế pêi cheăng; Kơxop hlá mơéa Luât Cheăng pêi (‘mâi pơhlêh) ƀă kơxop hlá mơ-éa Luât ‘mâi pơhlêh, ‘mot tơ’nôm mâu tơdroăng dêi Luât Ƀaoh hiêm khăm pơlât rêm tơdroăng tơkêa kơxop hlá mơéa Luât châ xo 5 rơkong pâ thế, thế ‘mâi pơhlêh, ‘mot tơ’nôm.

Tơdroăng ki xiâm dêi mâu rơkong pâ thế, mơ’no, veăng tơpui dêi đoân viên, ngế pêi cheăng kong pơlê Kon Tum ƀă 3 kơxop hlá mơéa Luât (‘mâi pơhlêh) pơrá tung tơdroăng dế séa ngăn ing tơdroăng ki ai khât tung pêi cheăng, rêh ối, hriâm tâp, troăng tŏng gum ƀă rơhêng vâ pơkâ dêi Luât hmâ achê ƀă tơdroăng rêh ối. Tơpui ƀă mâu kuăn pơlê cho đoân viên, ngế pêi cheăng, pôa Phạm Đình Thanh, kăn phŏ pơkuâ khu ki cheăng dêi Khu kăn Kuô̆k hô̆i kong pơlê Kon Tum tơmâng xo, ƀă tối tiah kố, hên rơkong pâ thế, mơ’no, veăng tơpui tối dêi đoân viên ƀă ngế pêi cheăng cho tơxâng khât.