Hâi lơ 10/11, a pơlê kong kơdrâm Đà Lạt, Vi ƀan kong pơlê Lâm Đồng tơkŭm po hôp khu chêh hlá tơbeăng tơbleăng tơdroăng Festival reăng Đà Lạt roh má 9 hơnăm 2022 ƀă hên tơdroăng xiâm, tơdroăng ki má môi tơkŭm po sap ing khế 11 troh tâi khế 12. Nôkố tâi tâng mâu tơdroăng pơrá hiăng châ kong pơlê po rơdâ pêi pro, rak tơniăn kum tơtro ăm tơdroăng kal vâ lăm ngăn kế tơmeăm khoăng dêi tơmối.

Ƀă dó inâi ‘’Đà Lạt – pơlê kong kơdrâm pŭn rơnó reăng’’, Festival reăng Đà Lạt roh má 9 hơnăm 2022 tơkŭm po sap khế 11 troh tâi khế 12 ƀă tíu kân rơdâ lâp tơring, pơlê kong kơdrâm tung kong pơlê. Rơtế ƀă 9 tơdroăng ki xiâm, tung mê, ai hneăng hôp pêi pro Tơdroăng pêi dêi Chin phuh pêi pro Pơkâ kơxô̆ 23 hâi lơ 6/10/2022 dêi Khu xiâm kal kí ‘na troăng mơnhông mơdêk cheăng kâ – rêh ối pơlê pơla, tơniăn cheăng lêng, gâk kring kơpong Tây Nguyên troh hơnăm 2030, tơmiât pêi troh hơnăm 2045 ƀă mơhnhôk mơ’no liăn cheăng kơpong Tây Nguyên...

Festival reăng Đà Lạt roh kố ối ai hên tơdroăng mơhnhôk vâ tơmối lăm ngăn tơmeăm khoăng môi tiah: kơphô̆ chế – kơphế - drôu vang; leh xah hêi  khinh khí cầu; Roh kơchơ kơchâi drêh reăng; Carnaval troăng kơphô̆; Đà Lạt – Ôm hyô mâu pơlê reăng; mâu hneăng hôp, hneăng tơpui tơno khoa hok, mơđah tơbleăng tơmeăm khoăng, kơchơ mơđah tơmeăm mơdró lâp plâi tơnêi.