A tơring Lạc Dương, tung khế 11 kố kô tơkŭm po 3 tơdroăng pêi pro môi tuăn Festival Reăng Đà Lạt roh má IX hơnăm 2022. Ki nhên, hâi lơ 19/11, kô pơxiâm po Rơnó leh xah hêi Nhâ khêi Lang Biang. A kố rơnuâ 5 tơmeăm ki lĕm dêi mâu tíu ôm hyô, tơdrêng amê tơkŭm po mâu tơdroăng xah hêi tiô khôi vâi krâ nah, tơdroăng pêi Team Building tơdjâk troh tơdroăng mơhno khôi túa lĕm tro pơlê pơla mơngế hdroâng kuăn ngo K’Ho.

Hâi lơ 26/11, a cheăm Dă Nhim kô tơkŭm po Tơ’noăng pro kơchâi kâ kơhiâm ƀă drôu xiâm Lang Biang roh má I, veăng amê ai 6 khu. Xuân roh kố, a kố kô tơkŭm po Leh xah hêi tơ’noăng to xêi ôh tá ai an roh má I, rah xo 32 to xêi ki tơ’noăng ing 6 cheăm, pơlê kân ƀă mâu khu tê mơdró tung kong pơlê. Pôa Sử Thanh Hoài, Kăn hnê ngăn Vi ƀan tơring Lạc Dương, kong pơlê Lâm Đồng tối ăm ‘nâi: tơdroăng hbrâ ăm 3 tơdroăng mơhnhôk Festival Reăng Đà Lạt roh má IX hơnăm 2022 hiăng pêi kêi đeăng tâi tâng.

“Pêi pro troăng hơlâ dêi Vi ƀan kong pơlê ‘na mâu tơring tung kong pơlê thế veăng pêi mâu tơdroăng vâ mơhnhôk Festival reăng Đà Lạt, tơring Lạc Dương xuân ai mâu tơdroăng pêi vâ mơhnhôk. Mê cho rơnó leh xah hêi nhâ khêi tiô tối hdrối pơxiâm po a hâi lơ 19/11, rơtế amê tơring Lạc Dương xuân tơkŭm po tơ’noăng pro kơchâi kâ kơhiâm, tôu chêng koăng, tơrŭm ƀă mâu khu tê mơdró tơkŭm po leh hêi tơ’noăng to xêi ôh tá an a cheăm Dă Nhim’’.

Nôkố, mâu tíu mơdró môi tiah hngêi mơdró tơmeăm ô kâ nhâ̆u, hngêi ăm tơmối kâ koi ối pơtê, kơpong lăm ngăn ôm hêi ôm hyô ƀă hiá hé a Lâm Đồng xuân hiăng hbrâ mâu tơmeăm ki kal vâ tơniăn pêi pro tơtro tơdroăng kal vâ dêi tơmối. Pôa Đinh Thiên Long, ngế pơkuâ hngêi mơdró tơmeăm ô kâ nhâ̆u a tíu xiâm pơlê kong kơdrâm Đà Lạt tối ăm ‘nâi, vâ mơhnhôk tơkŭm po Festival reăng Đà Lạt roh kố.

Pa kĭng mơdêk tơdroăng tê mơdró, hngêi tê mơdró ô kâ nhâ̆u dêi pôa hiăng hbrâ mâu kơchâi kâ ki má môi châ mơjiâng pro ing kơchâi drêh, pôm, plâi ki phá krê dêi Đà Lạt.

‘’Hdrối Festival mê tơdroăng apoăng mê ngin kêi đeăng ki kơnâ dêi môi hngêi mơdró tơmeăm ô kâ nhâ̆u ‘na tơdroăng tơdah tơmối, ‘na mơgrúa tơniăn kế kâ vâ tơdah hên tơmối ôm hyô. Đà Lạt hiăng ai tơmeăm hên, xua mê á pói vâ tơmối kô châ tâ, châ kâ, châ hlo khôi túa lĕm tơmeăm kâ dêi kuăn pơlê, pơlê kong kơdrâm reăng’’.

Pôa Tôn Thiện San, Kăn hnê ngăn Vi ƀan pơlê kong kơdrâm Đà Lạt, Kăn pơkuâ Khu tơkŭm po Festival reăng Đà Lạt roh má 9 tối ăm ‘nâi, mâu pơlê reăng, tiú chôu ‘măn reăng Đà Lạt đi đo rak tơniăn reăng lĕm, kum ăm tơtro tơdroăng kal vâ ngăn reăng dêi tơmối.

“Đà Lạt mơnhên ôh tá xê to Festival reăng nếo ai reăng, mê Đà Lạt cho pơlê kong kơdrâm reăng xua mê reăng đi đo ai rêm hơnăm, rêm ngế pêt reăng, rêm hngêi pêt reăng. Mâu pơlê reăng hơnăm kố xuân ai tơmeăm kum tung tơdah tơmối, pơtih pơlê reăng Vạn Thành kô chiâng lăm ngăn a kơmăng. Môi tơdroăng Festival reăng kô ton troh Têt, pơrá ai pơkâ pơ’lêh reăng đi đo ƀă reăng đi đo lĕm. Môi tiah mê, pakĭng tơdroăng “Kong plêng Tây Nguyên” xŏn rơdâ, mâu tíu chôu ‘măn reăng xuân ton troh a hâi têt’’.

Xuân môi tiah mâu hneăng Festival reăng hdrối, Festival reăng Đà Lạt roh má 9 tơmiât pơkâ troh pơlê pơla, xua mê ki hên mâu tơdroăng châ mâu khu tê mơdró, khu tơrŭm cheăng, rêm râ, ngế krê kĭ pêi pro. Tiô pôa Đặng Trí Dũng, Kăn phŏ hnê ngăn Vi ƀan kong pơlê Lâm Đồng, Kăn phŏ hnê mơhno tơdroăng Festival reăng Đà Lạt, troh nôkố mâu tơdroăng pơrá châ pêi pro chôa ‘lâng ƀă tro tơdroăng pơkâ, tơniăn môi hneăng Festival reăng lĕm ƀă lôi ăm hên tơdroăng ki lĕm tung hiâm mơno tơmối.

Ing mê, kum thăm mơhnhôk tơdroăng kal vâ ôm hyô ƀă mơdêk tơdroăng rêh ối mơhno khôi túa lĕm tro ƀă hiâm mơno dêi kuăn pơlê a kong pơlê.

‘’Troh nôkố mê tơxâng tiô pơkâ xuân môi tiah pơkâ mơ’no, tá ‘na hâi khế, tơdroăng xiâm ƀă tơdroăng hbrâ rơnáu. Khu hnê mơhno, Khu tơkŭm po ƀă 4 tiêuh ƀan pơrá po rơdâ pêi pro tơdroăng tá hiâm mơno. Festival reăng hơnăm kố troăng tơmiât tơdjuôm cho a lâp lu, ai mâu tơdroăng xiâm kơ’nâi Festival mê pơtối ti tăng, tơdah; laga mâu tơdroăng xiâm, pơtih tơdroăng ngăn tơdroăng ngê̆ thuât mê u ối tung hiâm tơmối cho tơdroăng ki lĕm ‘na Đà Lạt, ‘na Lâm Đồng, ‘na kuăn mơngế, ‘na mâu tơmeăm tung mê ai tơdroăng ‘na reăng’’.

Ƀă dó inâi “Đà Lạt – pơlê kong kơdrâm reăng pŭn rơnó”, Festival reăng Đà Lạt roh má 9 hơnăm 2022 tơkŭm po sap ing khế 11 troh tâi khế 12 ƀă ai a lâp lu mâu tơring, pơlê kong kơdrâm tung kong pơlê. Rơtế ƀă 9 tơdroăng ki xiâm mê cho: tíu chôu ‘măn reăng, tơdroăng ngê̆ thuât ‘’Bảo Lộc xú lĕm chếi, tơ-eăng’’, tơdroăng ngê̆ thuât ki phá tơ-ê tơbleăng Festival Reăng Đà Lạt roh má 9 hơnăm 2022, mơđah tơbleăng hmân ếo pơtâk ‘’Ché lụa – Troăng tơmeăm kơnía’’ ƀă Tíu mơđah tơbleăng ‘’Kong plêng Tây Nguyên’’, mơđah tơbleăng reăng ƀă loăng ai reăng lâp plâi tơnêi, hneăng hôp pêi pro Tơdroăng pêi dêi Chin phuh pêi pro Pơkâ kơxô̆ 23 dêi Khu xiâm kal kí ‘na troăng mơnhông mơdêk cheăng kâ – rêh ối pơlê pơla, rak tơniăn cheăng lêng, gâk kring kơpong Tây Nguyên troh hơnăm 2030, tơmiât pêi troh hơnăm 2045 ƀă mơhnhôk mơ’no liăn cheăng kơpong Tây Nguyên./.