Gia Lai dế mot tung rơnó tô khăng khoăng, tơ’lêi chếo kong a kơlo ki râ má V – cho râ ki rơ-iô. Nôkố, hrĭng rơpâu hectar kong a tâi tâng mâu tơring dêi kong pơlê Gia Lai dế trâm ƀă tơdroăng tơ’lêi chếo kong a rơnó tô. Tung mê, tơring Chư Păh ai lối 7.169 hectar, tơkŭm a mâu cheăm Hòa Phú, Nghĩa Hưng, Chư Đang Ya, Đăk Tơ Ver, Ia Khươl ƀă pơlê kân Phú Hòa ối tung khu ki rơ-ê. Ki rơhêng vâ tối, kong loăng hngó pái kơtâ hlá ƀă hlá pêi hbo cho tơdroăng ki tơ’lêi on chếo kâ.

Vâ kơdroh tơdroăng ki tơ’lêi chếo, sap ing apoăng rơnó khăng khoăng, mâu tơring tung kong pơlê Gia Lai hiăng rah xo klêi Khu pơkuâ Hnê mơhno hbrâ mơdât chếo kong, mơjiâng pơkâ pêi hbrâ mơdât. Khu cheăng thăm pơtâng tối, hnê mơhno kuăn pơlê xúa on tơniăn, séa ngăn krá tơniăn tung mâu khế tơ’lêi chếo kong. Mâu khu pơkuâ kong tơrŭm ƀă khu râ kăn pơkuâ ƀă khu gâk ngăn kong tơkŭm po pơtâng tối a mâu thôn, pơlê; pơchân tối kuăn pơlê ai chiâk deăng achê kong ôh tá xúa on hmâng vâ, tơdrêng amê tâp kơƀâng tơbleăng tối a mâu kơpong ki tơ’lêi chếo kong.