Tiô tối tơbleăng, tung rôh 30/4 hơnăm kố kô ăm rơxế kơtâu cho 228km troăng kân tiah mê, tung lâp tơnêi têa kô ai 2.250 km troăng kân châ pro klêi; troh mơ’nui hơnăm kố châ 2.920 km. Tâng pro klêi tâi tâng mâu troăng kân dêi mâu kong pơlê mê kô châ dâng 3.210 km. Pakĭng mê, ối 2 tơdroăng tơkêa pro troăng kân Đồng Đăng – Trà Lĩnh ƀă Hữu Nghị - Chi Lăng, tâng châ pro klêi tung hơnăm 2025 mê tâi tâng kơxô̆ km troăng kân ing Kơnhŏng troh hdroh cho 3.345 km.

Ngế pro xiâm hnê ngăn tơnêi têa pơkâ thế khu lêng, kŏng an séa ngăn tơdroăng cheăng a mâu troăng kân, malối cho troăng kân Lạng Sơn – Cao Bằng. Ngế pro xiâm hnê ngăn tơnêi têa tối nhên tâng mơdêk rơdêi tơdroăng pro, séa ngăn tơdroăng pro ƀă tâi tâng mâu troăng pro ki tơdjâk veăng pro mê ôh ti xê to 3.000 km troăng mê kô pro klêi 3.300 km, luâ 10% tâng vâ pơchông ƀă pơkâ mơ’no.