Khu pơkuâ hnê ngăn xiâm Đảng Kŏng san Việt Nam, Kuô̆k hô̆i Kŏng hoa xah hô̆i chuh ngiah Việt Nam, Kăn xiâm hnê ngăn tơnêi têa Kŏng hoa xah hô̆i chuh ngiah Việt Nam, Chin phuh tơnêi Kŏng hoa xah hô̆i chuh ngiah Việt Nam, Vi ƀan Xiâm Măt trâ̆n Tơnêi têa Việt Nam tối tơbleăng: Pôa Khamtay Siphandone, kot mâ hâi lơ 8/2/1924, cho Kăn xiâm hnê ngăn Khu pơkuâ xiâm Đảng Nhân yân Kăch măng Lếo, cho Kăn xiâm hnê ngăn tơnêi têa, cho Ngế pro xiâm, phŏ ngế pro xiâm, Ngế xiâm pơkuâ lêng kong têa Kŏng hoa Yân chuh Nhân yân Lếo hiăng kơtê i hiâm a 10h30 phut, châ 101 hơnăm.

Pôa Khamtay Siphandone cho môi tung mâu kăn pơkuâ djâ troăng ahdrối tung tơdroăng mơjiâng troăng prôk kăch măng dêi Lếo. Pôa hiăng rơtế mâu kăn ki ê hneăng hdrối nah tơkŭm po, pơkuâ tơdroăng cheăng kăch măng ƀă châ mâu tơdroăng ƀlêi trâng pơtối, djâ Kăch măng Lếo troh hâi ƀlêi trâng tâi tâng, chôa ‘lâng djâ tơnêi têa Lếo krá tơniăn to Chuh ngiah xah hô̆i. Pôa cho ngế pú hmâ ki achê, hmâ dêi Đảng, Tơnêi têa ƀă kuăn pơlê Việt Nam, đi đo tơmâng tŏng gum ƀă ai hnoăng kân kĭn, veăng kum kal khât tung tơdroăng mơjiâng, pro krá tơniăn ƀă mơnhông tơrŭm nhŏng o kân kĭn, tơrŭm môi tuăn ki má môi, tơrŭm tâi tâng Việt Nam – Lếo tung plâ pơla kố nah. Pôa lêk lôi cho môi tơdroăng ki hía kân ƀă tơnêi têa Lếo ƀă tơrŭm cheăng Việt Nam.

Vâ mơhno hiâm mơno pâ mơjo kơ pôa Khamtay Siphandone ƀă ing tơrŭm ki má môi Việt Nam – Lếo, Khu pơkuâ xiâm pơkuâ hnê ngăn Đảng Kŏng san Việt Nam, Kuô̆k hô̆i tơnêi têa Kŏng hoa xah hô̆i Chuh ngiah Việt Nam, Kăn xiâm hnê ngăn tơnêi têa Kŏng hoa xah hô̆i chuh ngiah Việt Nam, Chin phuh tơnêi têa Kŏng hoa xah hô̆i Chuh ngiah Việt Nam ƀă Vi ƀan xiâm Măt trâ̆n Tơnêi têa Việt Nam pơkâ vâ mơdâm pôa Khamtay Siphandone tiô tơdroăng po mơdâm lâp tơnêi têa tung 2 hâi, sap ing hâi lơ 4 troh hâi lơ 5/4/2025.

Tung pơla kố, mâu kơ koan, tíu pêi cheăng tung lâp tơnêi têa teăng mâ dêi Việt Nam a kong têa ê chúa hlá kơ ki mơhno tối ai ngế hlâ, ai kơxái ki kât môi tiah pơkâ; ôh tá tơkŭm po mâu tơdroăng xah hêi ro pơlê pơla.