Tung mê ai vâ chê 1.500 rơpŏng châ tŏng gum mơjiâng hngêi nếo ƀă 440 rơpŏng châ tŏng gum rơnêu hngêi. Tiah mê troh nôkố kong pơlê Kon Tum hiăng châ 2/3 pơkâ pêi têa tah hngêi pơtân, hngêi xi kơchoh, pro ăm hngêi nếo. Kong pơlê dế tơkŭm mâu ngế pêi cheăng, kơxô̆ liăn vâ troh mơ’nui khế 6 kô kêi đeăng tơdroăng têa tah 824 toăng hngêi pơtân, hngêi xi kơchoh ki u ối nếo. Kon Tum pêi pro hên troăng hbrâ pro tơniăn tuăn tơmiêt tơkôm, tơngah to a kơxô̆ liăn tŏng gum; tơdroăng kế tơmeăm mơjiâng ôh tá ai tŭm ƀă to kơnâ yă; ôh tá ai ngế pêi cheăng tŏng gum xua kuăn pơlê hiăng mot tung rơnó pêt mơjiâng tơmeăm ƀă hía hé.

Hâi lơ 11/4, Kŏng ti pêi cheăng tiô rơnó môi tung khu 72 (Ƀinh đoàn 15) hiăng po leh pơxiâm têa tah hngêi tơ’nhiê xi kơchoh ƀă diâp liăn tŏng gum ăm 26 rơpŏng cho kŏng nhân ƀă kuăn pơlê a tơring Đức Cơ, kong pơlê Gia Lai. Kŏng ti pêi cheăng tiô rơnó 72 hiăng mơhnhôk veăng tơlo hên kơxô̆ liăn, tơdjuôm ivá tŏng gum pro nếo 23 toăng hngêi, ‘mêng rơnêu 3 toăng hngêi ki ton, ƀă tâi tâng kơxô̆ liăn ‘no pro lối 1,3 rơtal. Rơtế amê, Kŏng ti hiăng mơhnhôk kăn ƀô̆, lêng ƀă pro tơ’lêi hlâu ăm kŏng nhân, ngế pêi cheăng xo liăn hdrối vâ ai liăn pro hngêi lĕm tâ. Hdrối mê, hơnăm 2024, Kŏng ti 72 xuân hiăng mơhnhôk veăng tơlo liăn vâ tŏng gum pro 11 toăng hngêi khê̆n cho “Hngêi Khu pú”, “Hngêi Tơrŭm, "Hngêi Hơtôu kông đoàn” ƀă tâi tâng kơxô̆ liăn ‘no pro cho 760 rơtuh liăn.

A kong pơlê Dak Nông, Grup pơkuâ Kơmăi kơmok pro Kơchâ – Tơmeăm khoăng tung kơdâm tơnêi Việt Nam (TKV) hiăng diâp 350 rơtuh liăn vâ mơjiâng 5 toăng hngêi kum mâu rơpŏng kuăn pơlê hdroâng kuăn ngo kơtiê. Kố cho kơxô̆ liăn TKV ‘măn vâ pêi pro tơdroăng ‘’Têa tah hngêi pơtân, hngêi xi kơchoh pro ăm hngêi nếo’’ a Dak Nông hơnăm 2025. Rêm rơpŏng kuăn pơlê châ tŏng gum 70 rơtuh liăn vâ mơjiâng nếo hngêi ối. Mâu rơpŏng châ tŏng gum roh kố cho H’Dôi (ƀon Păng Sim, cheăm Trường Xuân, tơring Dak Song), Điểu Nguyên (ƀon Phi lơ te, cheăm Dak Ngo, tơring Tuy Đức); K’Sét (ƀon B’Nor, cheăm Dak Som, tơring Dak Glong), Thị Nhú (ƀon Bu sê rê I, cheăm Dak Ru, tơring Dak R’lấp) ƀă Nông Văn Dương (cheăm Ƀuôn Choáh, tơring Krông Nô).