Kơxo hâi lơ 16/4, rơpâu ngế kăn ƀô̆, đảng viên kong pơlê Kon Tum hiăng veăng hôp tơdrêng tiô troăng Hyôh tung lâp tơnêi têa hnê pêi tơdroăng Pơkâ hneăng hôp má 11 Khu kăn xiâm pơkuâ hnê ngăn Đảng hneăng 13. Pro tơ’lêi hlâu vâ đảng viên châ ‘nâi mâu tơdroăng nếo ai, Kon Tum tơkŭm po 121 tíu tơkŭm hôp tiô troăng hyôh râ kong pơlê troh a cheăm.

Hbrâ tơbleăng pơkâ hneăng hôp kân má 11, hdrối mê, a pơlê kân Mang Deang, tơring Kon Plông, Khu kăn pơkuâ hnê ngăn Đảng kong pơlê Kon Tum ƀă Quảng Ngãi hiăng tơkŭm po hôp tơbleăng troăng rơhlâ dêi Tíu xiâm tơnêi têa ‘na tơdroăng tơ’mot kong pơlê. 2 Kong pơlê môi tuăn mơjiâng 6 tôh pêi cheăng vâ rĕng pêi mâu tơdroăng kal ki pơcháu.

-Vi ƀan hnê ngăn kong pơlê Dak Lak hiăng pơkâ tơdroăng ki tơkŭm po xo rơkong tơpui tối dêi kuăn pơlê ƀă tơdroăng ki kal ‘na tơdroăng tơkêa klâ xoăng, ‘mot tơkŭm tíu pêi cheăng râ kong pơlê, râ cheăm. Tiah mê, tơdroăng ki xo rơkong tơpui tối châ pêi pro ƀă tơdroăng ki xoăng phĭu ăm ngế ki teăng mâ rơpŏng hngêi.

Tung pơla tơkŭm po xo rơkong tơpui dêi kuăn pơlê cho hâi lơ 20/4. Klêi mê, Vi ƀan hnê ngăn râ cheăm, tơring ƀă Khu ngăn tơring, cheăm ƀă hnoăng cheăng dêi mâu kăn ƀô̆ Dak Lak xo tơkŭm, tơbleăng tơdroăng, rak tơniăn tơdroăng ki pơtroh ăm Hô̆i đong hnê ngăn rêm râ séa ngăn sap ing hâi lơ 21 troh hâi lơ 24/4.

Vi ƀan hnê ngăn kong pơlê Dak Lak pơkâ thế mâu tơring, cheăm tơbleăng kơtăng, tro pơkâ, rak tơniăn tơdroăng ki tơdrăng ƀă tro tơdroăng, ing mê pro chiâng tơdroăng ki môi tuăn tung kuăn pơlê ƀă tơdroăng ki xing xoăng mâu tíu pêi cheăng a kong pơlê.

-Kong pơlê Dak Nông pơkâ 8 tơdroăng ki kal vâ tơbleăng xing xoăng nếo tíu pêi cheăng râ cheăm ing tơdroăng rak tơniăn lĕm, tro tiô khoa hok, tro tiô pơkâ. Luât pơkâ apoăng thế tơniăn hnoăng pơkuâ, tŭm tơdroăng cheăng dêi Đảng tung tâi tâng pơla xing xoăng pro rế lĕm a mâu cheăm. Luât pơkâ má péa cho pêi pro tro luât, rak tro luât pơkâ ki hiăng châ kĭ.

Má pái, cho pêi ahdrối tơdroăng xing xoăng pro rế lĕm mâu tíu pêi cheăng ki pêi châ tơbrê nhên ‘na tơnêi tíu ki ai xêh lơ pơkâ kơxô̆ kuăn pơlê tiô pơkâ dêi Vi ƀan pơkuâ cheăng Kuô̆k hô̆i. Luât má pŭn cho riân troh tơdroăng ki ai xêh, tơmeăm khoăng, tơdroăng mơnhông vâ tơƀrê pơtối rak ki rơdêi dế pơlê cheăm klêi tơ’mot tơdjuôm. Má pơtăm, cho ôh tá pơ’lêh tơnêi tíu râ tơring.

Má tơdrốu, cho pêi cheăng xing xoăng nếo tơnêi tíu rơtế ƀă ‘mâi rah rế lĕm mơngế pêi cheăng ăm tơnêi têa, iâ mơngế tê, pêi cheăng tơbrê, ai pơxúa. Má tơpah, ôh tá xúa pro kơtăng pơkâ kơphô̆. Môi luât pơkâ kal ki ê Dak Nông ai tối cho thế pêi tro tơdroăng hnê tối, mơhnhôk, tơmâng xo tơdroăng veăng hnê tối dêi kuăn pơlê vâ châ môi tuăn, tơrŭm môi tuăn tung kuăn pơlê ‘na tơdroăng xing xoăng pro rế lĕm tơdroăng tơ’mot râ cheăm.