*** Hâi lơ 26.04.1975, klêi môi pơla tơplâ rĕng, rế prôk rế plâ ƀâ lêng kong têa ê pro tơleăng lĕm pơlê pơla, rế tơ’nôm khu lêng, 5 ƀinh đoân ki xiâm dêi Khu lêng tơleăng lĕm klâ chiâng 5 troăng rơtế tơplâ ƀâ a tíu xiâm pơlê kong kân Sài Gòn – Gia Định. Mô đô̆i hneăng hdrối nah - pôa Đoàn Đình Điểu, vêh pâ: Sư đoân ƀô̆ ƀinh 968, Kuân khu 4, tơdah hnoăng cheăng plâ tíu ki tât dêi khu lêng kong têa ê a Đồng Dù (Củ Chi), mơjiâng ki pơxúa vâ khu lêng pin mot plâ a Sài Gòn. Hâi lơ 29/4, ôh tá xâu ƀom, ‘mrâm pháu dêi lêng kong têa ê, ƀă hiâm mơno vâ hlâ ăm tơnêi têa, pôa ƀă khu pú hiăng djâ troăng ahdrối po troăng:

"Tâi tâng sư đoân 968 ngin châ pơkâ po 4 troăng plâ ƀâ: peăng mâ Hâi luô, Peăng mâ hâi luô Pá Hdroh, Peăng Mâ hâi lo pá Hdroh, peăng Kơnhŏng. Ngin mot, đăi đô̆i dêi á châ achê klôh, chiâng klôh, xua kơpong mê ôh tá ai loăng, kơ’nâi cho kong loăng kơxu, ƀă peăng hdrối to klâng... Ngin thế mot pái xôh nếo po châ troăng vâ plâ ƀâ’’.

*** Chôu vế tơdroăng ton nah dêi rôh tơplâ drêng rơxế kom ƀa 390 klâm kơtong péa cheăng Dinh Độc Lập, pôa Ngô Sỹ Nguyên, mố đô̆i hneăng hdrối, ngế ki vê rơxế kom ƀa 390 ăm ‘nâi:

“Rôh tơplâ inâi Hồ Chí Minh gá rĕng khât, thâ khât, châ ƀlêi trâng tơniăn. A tíu ki vêh peăng mâ hâi lo, khu lêng 2 dêi ngin ai 2 toăng rơxế kom ƀa ki rĕng troh má môi cho rơxế 843 ƀă 390, cho 2 toăng rơxế dêi đăi đô̆i trưởng Bùi Quang Thận ƀă ngế cheăng kal kí cho Vũ Đăng Toàn. Rơxế kom ƀa 390 dêi ngin mơdêi klâm kơtong péa cheăng mot tung Dinh Độc Lập, teăng mâ ăm ivá rơdêi dêi khu lêng kuăn pơlê Việt Nam klâm rôih hnâp môi khu pơkuâ, teăng mâ ăm tơdroăng ki hâk vâ tơdroăng ki hơniâp lĕm dêi hdroâng mơngế Việt Nam. 21 hơnăm to tơdroăng ki pá puât hlâ rêh nếo châ tơdroăng ki hơniâp ro kố”.

Tung hâi leh tơbâ "Tơnêi têa chiâng môi kơpong", pôa Hồ Việt Hà, ối a pơlê kân Long Biên, Hà Nội vêh pâ vế:

“Á troh akố tung hiâm mơno tâ rơrêk dêi hâi lơ 30/4, leh tơbâ 50 hơnăm ƀlêi trâng tơleăng lĕm Sài Gon. Á xông kân drêng roh tơplâ xâ Mih, kơ’nâi mê cho roh tơplâ gâk kring tơkăng kong Peăng Kơnhŏng, peăng Hdroh tơnêi têa. Drêng kố vêh pâ á hêng krôu. Á vâ hvái ngăn mâu tơdroăng ki kơnâ vâ tiâ tối môi tơdroăng: Xua ti lâi Đảng ƀă Pôa Hồ pơkuâ tơnêi têa pin tơkâ tơplâ xâ Pơhlăng, Tơplâ xâ Mih ƀă kuăn pơlê ing Peăng Kơnhŏng troh peăng Hdroh hiăng tơmiât troh môi roh tơplâ tơleăng lĕm tơnêi têa môi tiah lâi’’.

‘Na tơdroăng ki lăm mot plâ dêi Kuân đoàn tung rôh tơplâ inâi Hồ Chí Minh ton nah, Đăi tươ̆ng Phạm Văn Trà, cho ngế xiâm pơkuâ ngăn lêng hneăng hdrối, ăm ‘nâi, Tơnêi têa hiăng rơkê khât, mơ-eăm kơtăng tung hnê mơhno 5 tíu ki lăm plâ ƀâ. Ƀă pa kĭng ivá rơdêi dêi khu lêng, khu pơkuâ tơdroăng kal kí, hnoăng cheăng mơhnhôk, xâ ai hên tơdroăng ki 'ló, pro ăm xâ chiâng tơprâ.

‘’ Pin tơleăng tâi tâng peăng Hdroh, cho ngăn tung ivá rơdêi dêi tâi tâng kuăn pơlê, cho kơnôm tung ivá rơdêi dêi pái tíu xiâm tơdjêp hnoăng ki khu lêng cho xiâm. Kố cho tơdroăng pơkuâ, hnê mơhno dêi Đảng pin, dêi Khu xiâm pơkuâ tơdroăng kal kí rơkê plĕng khât. Hnê mơhno rơkê plĕng nếo cho hdrối mê drêng Kuân đoàn 4 ôh tá châ mot tung Dinh Độc Lập xua dế pá a Xuân Lộc mê pơkâ thế Kuân đoàn 2 tơkâ têa kroăng Đồng Nai mot tơdrêng hlối. Klêi Dương Văn Minh tối tơbleăng hiăng thu, kuăn pơlê peăng Hdroh vâi xông lăm rơtế ƀă khu lêng kring vế kong pơlê tơleăng mâu tơring cheăm. Tơdroăng pơkuâ dêi Đảng a 3 tíu ki xiâm tơdjêp hnoăng tơdjuôm khu lêng – kal kí – hnê mơhnhôk, pơlông xâ, tâi tâng môi tiah mê pin hiăng tơleăng peăng Hdroh, pro tơnêi têa tơrŭm môi”.