*** Riân troh tâi khế pái hơnăm 2025, lâp tung kong pơlê Dak Nông ai 70.671 rơpŏng dế mung liăn a Hngêi rak liăn kum mâu kơtiê, ƀă tâi tâng kơxô̆ liăn chĕn vâ chê 4.800 rơtal liăn. Tung mê, lối 24.000 rơpŏng kuăn ngo, ƀă kơxô̆ rơlối chĕn lối 1.655 rơtal liăn. Tâi tâng mâu rơpŏng hngêi xuân xúa  ai tơƀrê. Rơpŏng hngêi pôa K’Biêng ối a ƀon Phai Lol Pruđăng, cheăm Dak Nia, pơlê kong kơdrâm Gia Nghiã, ai 2 ha tơnêi. Rơpŏng hngêi châ mung 90 rơtuh liăn ing hngêi rak liăn kum mâu kơtiê ‘no liăn pêt kơphế, tiu châ xo hên.

“Hơnăm kố, xo dêi kơphế châ dâng 2,5 - 3 tâ̆n kloăng gá, ƀă tá tiu há. Tê xuân châ sap 200-250 rơtuh liăn/hơnăm. Tâi tâng xuân kơnôm ing kơxô̆ liăn mung ‘no pêi cheăng kâ mung ing hngêi rak liăn tung hên hơnăm hdrối . Nếo achê kố, ối mung tơ’nôm 12 rơtuh liăn vâ chiâ klôh khuăng tăng têa mŏng, rôe kơthung hdoăng têa, kơnôm ing mê ai têa krúa tơniăn lĕm ivá ăm rêm ngế tung rơpŏng hngêi".

*** Troh nôkố, tâi tâng kơxô̆ liăn dêi Hngêi rak liăn tŏng gum rêh ối pơlê pơla kong pơlê Gia Lai châ 7.631 rơtal liăn, tâk 153 rơtal tâng pơchông ƀă apoăng hơnăm, tung mê kơxô̆ liăn hngêi rak liăn tŏng gum kong pơlê châ 598 rơtal. Khu kăn ƀô̆ ki ăm mung liăn hiăng tơrŭm ƀă kăn ƀô̆ mâu khu tơrŭm tơdroăng kal kí rêh ối pơlê pơla, ƀă mâu Tôh kơdĭng ƀă mung liăn a pơlê cheăm kơpong kuăn pơlê rêh ối. Kơnôm tiah mê, ki hên mâu rơpŏng mung liăn pơrá xúa tro tơdroăng. Pôa Ksor Biếc, krâ pơlê Rơng, cheăm Pờ Tó, tơring Ia Pa ăm ‘nâi:

“Hdrối nah, á mung liăn ing hngêi rak liăn vâ roê ro, á mung 30 rơtuh, klêi mê roê 3 to ro. Klêi kơ’nâi 5 hơnăm mê á tê ro vâ xo liăn mơdrếo ăm hngêi rak liăn, ƀă á hiăng mơdrếo klêi. Nôkố á tơkŭm mơnhông cheăng kâ rơpŏng hngêi xo”.