Krê tung hơnăm 2025, kong pơlê mơ-eăm djâ 2.500 ngế pêi cheăng lăm a kong têa ê pêi cheăng, tâk péa xoh tơdế tâng vâ pơchông ƀă hơnăm hdrối. Vâ pêi pro tơdroăng pơkâ mơ’no, Dak Lak hiăng hnê mơhno Tíu xiâm tơbleăng tơdroăng cheăng pêi tơrŭm ƀă mâu khu mơdró kâ ki ai tơdjâk troh djâ mâu ngế pêi cheăng lăm pêi cheăng a kong têa ê, tơkŭm hnê tối, tiâ mơnhên a mâu thôn pơlê, ƀă tôh kơphô̆ tung kong pơlê. Tơdrêng amê, kong pơlê hiăng tơbleăng kĭ tơkêa tơdroăng tơrŭm ƀă Khu pơkuâ ngăn lêng kong pơlê vâ tơkŭm po tiâ mơnhên ăm mâu khu lêng ki pro mố đô̆i hiăng vâ klêi.

Pôa Nguyễn Quang Thuận, phŏ kăn pơkuâ Khu ngăn tơring, cheăm hnoăng cheăng mâu kăn ƀô̆ kong pơlê Dak Lak ăm ‘nâi, kong pơlê hiăng tơbleăng tơƀrê mâu troăng hơlâ tŏng gum ngế pêi cheăng hriâm cheăng pêi ƀă lăm pêi cheăng a kong têa ê; malối cho mâu hdroâng kuăn ngo châ tŏng gum sap ing 12 troh 16 rơtuh liăn ăm rêm ngế pêi cheăng vâ hriâm cheăng pêi, hriâm nâl tơpui ƀă pro hlá mơ-éa hbru ăm visa:

"Kố cho kơxô̆ liăn gá hên vâ gum pro tơ’lêi hlâu tăng cheăng pêi ăm mâu vâi o, malối cho hdroâng kuăn ngo. Tơdroăng kố ngin xuân hiăng hnê mơhno ăm mâu Tíu xiâm hnê cheăng pêi, yăo yuk thương xuên a kong pơlê vâ ai tơdroăng tơrŭm tơdâng tơ’mô. Nôkố Khu xuân dế pơtối pêi cheăng ƀă mâu kơ koan kơvâ cheăng vâ ai troăng hơlâ pêi tơtro tung tơdroăng hnê cheăng pêi ăm droh rơtăm hdroâng kuăn ngo xuân môi tiah tăng cheăng pêi ăm mâu ngế ki kố”.