Hơnăm kố kong pơlê Kon Tum ai lối 5.300 ngế hok tro chêh inâi tơ’noăng mơgêi hriâm râ má pái phôh thong. Vâ tơƀrê tung hriâm rơbot ƀai ton, lối 220 ngế thái cô hiăng pleăng tơná veăng gum hnê ăm hok tro. Ngăn tiô kơ điêm ki ai drêng mơnúa tơ’noăng ƀă tung pơla hriâm rơbot sap khế 3 nah troh nôkố, hok tro châ klâ pro 3 khu: mâu ki ôh tá rơkê, mâu ki rơkê râng dế, mâu ki rơkê ƀă ki rơkê khât.

Tơdroăng hriâm rơbot ƀai ton châ tơkŭm po tơtro tiô ivá hriâm dêi khu vâ gum ăm mâu vâi o hlê plĕng nhên ƀai hriâm, hlê tơdroăng pro ƀai.   Khu xiâm ngăn Hnê hriâm ƀă Hnê mơjiâng tuăn ngôa rơkê kong pơlê Kon Tum hiăng mơjiâng khu lăm séa ngăn troh a mâu hngêi trung vâ kơ-êng mâu hok tro, kơjo gum, hlối pâ thế Ngế pơkuâ hngêi trung séa ngăn nhên tơdroăng ki hok tro hriâm rơbot ƀai ton tơrêm hâi, tơrêm măng tĭng mê. Mâu hngêi trung xuân séa ngăn nhên tơdroăng hriâm rơbot dêi hok tro hlê tơkéa lâi ƀă vâ tối tơdroăng hriâm rơbot tơrêm môn. Kố cho tơdroăng ki mơ-eăm khât vâ ai hên hok tro ai điêm hên châ plah tung hneăng tơ’noăng kố ah.