Tung kơxô̆ ki kố, ai 6.191 toăng pro nếo ƀă 1.440 toăng cho ‘mêng hngêi ki ton. Tiô tơdroăng pơcháu, kong pơlê Gia Lai kô gum ăm 8.155 rơpŏng têa tah hngêi ối pơtân, xi kơchoh. Tung mê, ai 6.562 rơpŏng châ pro ăm hngêi nếo ƀă 1.593 rơpŏng châ ‘mêng pro ăm hngêi ki ton. Tâi tâng kơxô̆ liăn ‘no ăm tơdroăng kố cho lối 441 rơtal. Rêm toăng hngêi pro ki nếo cho 60 rơtuh liăn; hngêi ‘mêng ki ton cho châ tŏng gum 30 rơtuh liăn.

Pôa Dương Văn Tuấn, Kăn hnê ngăn Vi ƀan cheăm Ia Piar, môi tung mâu cheăm ki djâ troăng ahdrối tung tơdroăng ki têa tah hngêi ối pơtân, xi kơchoh a tơring Phú Thiện, ăm ‘nâi: tâi tâng mâu khu pơkuâ tơdroăng kal kí rơtế veăng gum kuăn pơlê vâ rĕng pêi klêi tơdroăng. Ƀă tơdroăng tơbleăng têa tah hngêi ối pơtân, ôh ti xê troăng hơlâ tŏng gum tơdroăng vâ tơniăn tíu ối ăm lối 8.000 rơpŏng kuăn pơlê, mê ối veăng gum pêi pro pơkâ kơdroh kơtiê ƀă rak vế tơdroăng rêh kâ ối tung lâp kong pơlê Gia Lai.