Pôa Nguyễn Văn Bang, Kăn pơkuâ Kŏng ti pêi cheăng tiô rơnó môi tung khu Nhất Bang, pơlê kong kơdrâm Pleiku hlo, tơdroăng ki xiâm dêi Pơkâ cho hiăng pơkâ troăng tơmiât pơhlêh tơdroăng tê mơdró tiô troăng tơdrăng, tơniăn  ƀă hmâ achê ƀă khu mơdró kâ. Ki nhên, tơdroăng ki kơdroh kơxô̆ rôh lăm ngăn, séa ngăn khu mơdró kâ chu troh ôh tá luâ 1 xôh tung môi hơnăm, mơdêk rơdêi xúa ứng dụng pơhlêh kơxô̆, kơdroh séa ngăn tơdrêng ƀă pơxâu phâk kơtăng mâu ngế ki pro xôi cho mâu tơdroăng ki châ khu mơdró kâ hâk vâ.

Tơdroăng ki pơhlêh sap ing apoăng séa ngăn chiâng klêi séa ngăn, pơkâ tah lôi tơdroăng ki xơpá châ xúa kơchô tê mơdró kô lôu péa tơdroăng mơnhông ai pơxúa tâ ăm khu mơdró kâ. Malối cho tơdroăng ki tŏng gum liăn liah ăm mâu tơdroăng tơkêa bro ngiât, tê kơtê, kơdroh nâp hnoăng mơhá ăm khu mơdró kâ pơxiâm pêi cheăng tơmiât pêi rơkê, ƀă pơtê kơxô̆ liăn nâp hnoăng mơhá, kơxô̆ liăn  ing hơnăm 2026. Pôa Nguyễn Văn Bang mơnhên tối khât tơdroăng ki pơxâu phâk tiô luât tiô troăng kơjo gum troăng hơlâ liăn ngân, tơdroăng ki pơhlêh xua pro xôi, tơdroăng pơsăm tối pơsăm tơkêng ôh tá kâi tui ôh tá pơxúa, rak vế kế tơmeăm ki tro luât dêi khu mơdró kâ ki tơdroăng Pơkâ 198 hiăng tối nhên:

“Ƀă tơdroăng pơkâ nôkố, á loi tiah kố kơxô̆ liăn ăm mâu khu mơdró kâ krâ kơvâ ƀă kŭn, malối cho droh rơtăm pơxiâm vâ pêi cheăng, kô châ pơhlêh hên. Á loi tiah kố cheăng kâ krê kô mơnhông rơdêi xua châ Đảng, Tơnêi têa tơmâng ngăn tŏng gum ƀă mâu khu tơrŭm ăm mung liăn, hngêi rak liăn kô pro tơ’lêi hlâu vâ khu mơdró kâ châ mung liăn tiô túa ki rĕng ƀă tơ’lêi hlâu má môi”.

Pơkâ 198 mơhno nhên tơdroăng ki tơmâng ngăn dêi Đảng, Tơnêi têa ƀă kơpong cheăng kâ krê, ngăn kố cho môi ivá mơnhông ki kal dêi tơnêi têa tung chal ki nếo. Pôa Phan Thanh Thiên, Kăn hnê ngăn Khu mơdró kâ hơnăm ối nếo kong pơlê Gia Lai, tối: kố cho môi rôh ki tơ’lêi hlâu kân vâ khu mơdró kâ krê ‘nâi nhên. Pơkâ 198 dế châ mâu khu mơdró kâ Gia Lai tơdah xo ƀă hên tơdroăng tơngah. Vâi ngăn hlo amê môi tơdroăng tơhrâ kal kí rơdêi, môi troăng ngăn mơnhông ton xŏn, ƀă ki kal tâ cho môi rôh ki tơ’lêi hlâu vâ pro tơ’lêh mâu tơdroăng ki xơpá hiăng trâm ton khế hơnăm. Laga, pôa Phan Thanh Thiên, Kăn hnê ngăn Khu mơdró kâ hơnăm ối nếo kong pơlê Gia Lai, tối tiah kố, kal ai hnoăng cheăng pơkâ dêi khu kăn pơkuâ rêm râ tung tơkŭm po pêi pro, vâ ăm tơdroăng Pơkâ chiâng ivá rơdêi ăm mơnhông krá tơniăn dêi cheăng kâ krê.

“Á pâ thế kăn pơkuâ kong pơlê tơmâng ngăn hên tâ troh mâu khu mơdró kâ krê, xuân môi tiah khu mơdró kâ hơnăm ối nếo Gia Lai. Ki hdrối tâi, mâu troăng pơkâ, troăng tŏng gum kal nhên, tơdrăng, gum khu mơdró kâ rĕng châ xúa mâu tơdroăng tơkêa, hlá mơéa chêh pro ‘na luât. Tơdrêng amê kal pro tơ’lêi hlâu vâ khu mơdró kâ châ mung xo kơxô̆ liăn kơjo gum, tŏng gum mâu hơnăm ối nếo tung tơdroăng ki pơxiâm pêi cheăng ƀă mơjiâng khu mơdró kâ. Rơtế amê cho tơdroăng ki mơjiâng mâu tơdroăng pơkâ mơdêk tê mơdró, tơkŭm po mâu rôh hnê ‘na pơkuâ ngăn, pơhlêh kơxô̆, vâ mơdêk ivá tơxup ăm khu mơdró kâ a kong pơlê”.

Tơdroăng pơkâ 198 nếo châ Kuô̆k hô̆i tơbleăng ôh ti xê po môi chương ki nếo ăm cheăng kâ krê Việt Nam, mê ối têk bâ eăng tơdroăng loi ƀă tơdroăng púi vâ mơeăm dêi mâu khu mơdró kâ, malối cho a mâu kong pơlê ki ai hlâu mâu ivá môi tiah Gia Lai. Drêng mâu troăng hơlâ tŏng gum cho tơdroăng ki mơnhông châ pơhlêh pro ƀă tơdroăng pêi kơtăng ƀă tơdâng tơ’mô sap ing khu kăn pơkuâ rêm râ, khu mơdró kâ kô chiâng tơdrăng, tơƀrê tâ, pro ivá vâ cheăng kâ krê chiâng ƀlêi chiâng ki kal tung mơnhông tơnêi têa. Ƀă ivá hbrâ rơnáu pơhlêh nếo, mâu khu mơdró kâ Gia Lai dế tơdjuôm ivá, môi hiâm mơno vâ pro tơdroăng tơngah chiâng ai khât, veăng gum ăm tơdroăng mơnhông krá tơniăn dêi kong pơlê ƀă lâp tơnêi têa.