Pêi pro khŏm mơ-eăm dêi Khu xiâm kal kí, khế 3 – 1975, roh Tơplâ xâ ƀă xông tơplâ xâ dêi khu lêng ƀă kuăn pơlê pin rơnó Hơngui hơnăm 1975 pơxiâm po ƀă châ ƀlêi trâng pơtối. Pái tơdroăng tơplâ ton xŏn: Tơdroăng tơplâ Tây Nguyên po apoăng ƀă roh plâ ƀâ pơkuâ Ƀuôn Ma Thuột, tơleăng lĕm Tây Nguyên; Tơdroăng tơplâ tơleăng lĕm Huế - Đà Nẵng ƀă Tơdroăng tơplâ xâ Hồ Chí Minh tơleăng lĕm Sài Gon – Gia Định.

Mâu hâi má mơ’nui dêi tơdroăng tơplâ xâ, mơhé khu lêng kong têa ê châ pin plâ ‘nhê, laga vâi xuân ti tăng troăng vâ mơdât tơdroăng tơplâ dêi lêng pin. Hâi lơ 26/4/1975, klêi môi pơla plâ ƀâ rĕng, rế lo lăm plâ xâ lêng, rế tơ’nôm khu lêng, 5 ƀinh đoân ki xiâm dêi Khu lêng tơleăng lĕm klâ chiâng 5 tíu rơtế môi xôh plâ ƀâ a tíu xiâm pơlê kong kân Sài Gòn – Gia Định.

Troh 11 chôu 30 phut hâi lơ 30/4/1975, pôa Dương Văn Minh, Kăn xiâm pơkuâ ƀă tâi tâng khu râ kăn pơkuâ Việt Nam Kŏng hoa thế pâ thu ôh tá pâ ki klâi. Tơdroăng tơplâ xâ inâi Hồ Chí Minh ƀlêi trâng tâi tâng.

Ƀlêi trâng rơnó Hơngui 1975 mơnhên troăng ki pơkâ, djâ hdroâng mơngế pin mot chal ‘’tơniăn krê, môi tuăn tơnêi têa, xah hô̆i chuh ngiah’, tơdrêng amê mơhnhôk ó rơdêi tơdroăng tơleăng lĕm hdroâng mơngế ƀă tơplâ xâ xua hơniâp lĕm, rơkê tung lâp plâi tơnêi. Đăi tươ̆ng Phan Văn Giang, Kăn cheăng tung Khu xiâm kal kí, Phŏ kăn pơkuâ lêng Tơnêi têa, Ngế xiâm Khu xiâm pơkuâ lêng mơnhên:

‘’Klăng 11 chôu 30’ hâi lơ 30/4/1075, rôh lăm plâ Hồ Chí Minh  ƀlêi trâng, mơgêi ƀă tơdroăng plâ ƀlêi trâng xâ Mih, tŏng gum tơnêi têa. Mê cho hnoăng ki tơxâng ăm mâu troăng prôk  tơplâ pá puât, pơloăng mơnúa ƀă mâu ngế hiăng tơplâ lo mơheăm chhá, tơplâ ta troh hlâ, tơdroăng ki hía kân dêi mâu lêng ƀă kuăn pơlê pin. Plâ ƀlêi trâng rơnó Hơngui 1975  mơhno ăm hlo  troăng hơlâ dêi kăch măng, hriăn rơkê, troăng hơlâ pơkuâ hnê tơtro dêi Đảng; cho ƀlêi trâng ivá rơdêi dêi kuăn pơlê, mơhno ki lĕm tro  dêi tơdroăng pâ nhoăm tơnêi têa tơrŭm krá,  tuăn tơmiât vâ tơrŭm môi dêi tơnêi têa ƀă púi vâ hơniâp lĕm, tơrŭm krá ƀă dêi rơpó hdroâng kuăn ngo, tơrŭm  ivá rơdêi tiô rơxông”.

Kơ’nâi vâ châ tơdế chal, lâp tơnêi têa dế pơtối rak vế pêi pro hnoăng ki tơƀrê ƀă ƀai hriâm tơdroăng rơkê tơplâ rơnó Hơngui 1975,  pơxiâm mot tung rơxông nếo, mơnhông tơná hơniâp lĕm, rơdêi, kuăn pơlê kro mơdrŏng, tơnêi têa rơdêi, kuăn pơlê môi tuăn ƀă rơkê plĕng.