Leh tơbâ 50 hơnăm Hâi tơleăng lĕm peăng Hdroh, môi tuăn tơnêi têa ai 48 khu lêng, ƀă dâng 13.000 ngế veăng prôk pơtăng. Khu lêng Sinuâ, Lếo ƀă Kul rơtế veăng prôk pơtăng drô troăng kân roh kố.

Leh tơbâ po a kơpong tíu xiâm pơlê krâm 1, plông xiâm pro ‘na ngiâ Hngêi hôp kân Thống Nhất. Khu ki prôk pơtăng a troăng pơxiâm prôk a troăng Lê Duẩn – Nguyễn Bỉnh Khiêm prôk troh Hngêi hôp kân Thống Nhất klêi mê tơkâ luâ hên troăng dêi Pơlê krâm 1 (Pơlê kong kân Hồ Chí Minh) vâ kuăn pơlê ngăn hlo.

Tung rôh leh kô ai rôh pĕng 21 ‘mrâm a idrâp chuât dêi ƀai hơdruê Quốc ca Việt Nam. Kuân chủng Phòng không – Không quân pơtroh lối chât toăng tơƀai Mi-8, Mi-17, tơƀai tơplâ Yak-130 ƀă tơƀai Su-30MK2 kơneăng a ‘ngêi.

Tơdroăng ki ăm lêng prôk pơtăng, mâu khu lêng prôk ing peăng troăng kân Lê Duẩn – Nguyễn Bỉnh Khiêm, prôk tơkâ hluâ hngêi trá xiâm ahdrối Hngêi hôp kân Thống Nhất. Kơ’nâi mê, mâu khu lêng klâ 4 troăng, prôk tơkâ hluâ hên troăng kơphô̆. Tơdroăng prôk lăm tiô 4 troăng kô kum kơdrâm kuăn pơlê châ ngăn tơdrêng leh ăm lêng prôk pơtăng. Tơdrêng amê, pơlê kong kân Hồ Chí Minh hiăng krâ 20 um tơvi kân a mâu tíu ki tơ’lêi a hên troăng kơphô̆ vâ kuăn pơlê séa ngăn.