Pôa Phạm Minh Chính, Ngế pro xiâm hnê ngăn Chin phuh tối rơdêi, roh lăm pôu pêi cheăng ki má môi kơnâ tung pơla péa tơnêi têa leh tơbâ 75 hơnăm mơjiâng tơrŭm tơpui kâ ƀă kong têa ê (1950 – 2025) ƀă Việt Nam leh tơbâ 80 hơnăm mơjiâng tơnêi têa. Ngế pro xiâm hnê ngăn tơnêi têa mơnhên Việt Nam ôh tá la lâi piu mâu tơdroăng veăng, tŏng gum kơnía ki Hungary hiăng ‘măn ăm Việt Nam tung tơdroăng tơplâ tơbriât tơniăn lĕm, môi tuăn tơnêi têa hdrối nah ƀă mơjiâng, mơnhông mơdêk tơnêi têa nôkố.

Péa pâ môi tuăn pơtối pêi pro châ tơƀrê mâu tơdroăng môi tuăn pơla péa tơnêi têa, mơdêk tơrŭm krá tơniăn tung mâu kơvâ tiô khôi vâi krâ nah môi tiah tê mơdró, mơ’no liăn cheăng, khoa hok – kŏng ngê̆, hnê hriâm – hnê mơjiâng tuăn ngôa rơkê, gâk kring tơnêi têa – gâk kring tơniăn, pơkeăng, khôi túa lĕm tro – ôm hyô ƀă trâm mâ kuăn pơlê.

Tơdrêng amê, po rơdâ tơrŭm cheăng mâu kơvâ ki péa pâ ai tơmeăm rơdêi ƀă tơdroăng kal vâ tŏng gum dêi pó pơhlêh xúa kŏng ngê̆, tuăn ngôa rơkê, pêi chiâk deăng, ‘na mơjiâng pro pơkeăng, tơdroăng pêi cheăng.