Pôa Tô Lâm, Kăn xiâm pơkuâ hnê ngăn Đảng khĕn kơdeăn rêm pâ ki ai tơdjâk troh hiăng mơ-eăm hên tơbleăng hên troăng hơlâ vâ djâ Pơkâ 57 dêi Khu xiâm Kal kí xúa tung rêh ối. La, Kăn xiâm pơkuâ hnê ngăn Đảng xuân tối tiah kố, tơdroăng pơ’lêh kơxô̆, xúa khoa hok kŏng ngê̆, malối tơdroăng xiâm ‘na kŏng ngê̆ dêi mâu khu mơdró, a mâu khu xiâm kơvâ cheăng kong pơlê xuân ối tơvâ tơvân, xơpá ƀă hên tơdroăng ki hâi hlê pêi.

Tối nhên tơdroăng kal vâ pêi troh tơdroăng pro xiâm dêi khoa hok kŏng ngê̆ ai rah xo ing túa cheăng lâp plâi tơnêi, malối cho mâu kong têa ki djâ troăng a hdrối tung pơ’lêh hriăn plĕng ki nếo, pôa Tô Lâm, Kăn xiâm pơkuâ hnê ngăn Đảng pơkâ thế tung la ngiâ mâu khu xiâm, kơvâ cheăng , kong pơlê tơmâng pêi pro tah ki xơpá tơvâ tơvân tung tơbleăng pêi mâu tơdroăng ki nếo.