Tơdroăng tơkêa troăng kĭng peăng mâ hâi Lo pơlê kong kơdrâm Pleiku xŏn 15km, kơxô̆ liăn ‘no pro lối 1.300 rơtal, tơdjêp pơlê kong kơdrâm ƀă mâu tơring Đăk Đoa, Čư̆ Păh, tơkâ luâ mâu tíu ôm hyô ki châ vâi ô eăng dêi kong pơlê. Inâi khĕn “troăng cheăng kâ” ăm hlo kong pơlê Gia Lai tơngah hên a tơdroăng tơkêa kố, la nôkố tơdroăng tơkêa kố dế cho troăng hrá pro.

Maluâ pơxiâm pro sap ing mơ’nui hơnăm 2022, châ tơngah pro klêi ƀă ăm rơxế kơtâu a tơdế hơnăm 2025, laga troh nôkố tơdroăng ki pro krâ tơmeăm a troăng ki kố bu nếo châ 46%, liăn ngân ‘no pro vâ chê 740 rơtal. Tiô pôa Phạm Xuân Hiệp, Kăn pơkuâ Khu pơkuâ ngăn tơdroăng tơkêa pro troăng kong pơlê Gia Lai, tíu pêi cheăng dế mơ-eăm vâ ‘mâi mơnhông tơdroăng kố.

“Tung tơdroăng ki hnê mơhno dêi Chin phuh ƀă Vi ƀan hnê ngăn kong pơlê, tiô túa pơkâ hơnăm kố mê athế liăn ‘no pro châ 95%. Tung tơdroăng ki pơkâ pêi mê, Khu pơkuâ ngăn xuân ai mâu tơdroăng hnê mơhno nhên ƀă rêm tơdroăng tơkêa pro, malối cho ƀă mâu troăng pơkâ pro ki kal vâ rak vế tơniăn klêi pơkâ ‘no liăn pro tung hơnăm kố. ‘Na mâu tơdroăng ki xơpá, tơvâ a mâu tíu pro troăng xuân hiăng châ tŏng gum”.

A tơring Čư̆ Păh, tơdroăng ki ‘no liăn pro troăng rế hrá tâ. Tung tâi tâng kơxô̆ liăn 117 rơtal dêi hơnăm 2025, tơring nếo châ xo lối 3 rơtal liăn, bu châ lối 2% túa pơkâ. Mâu tơdroăng tơkêa pro troăng a Čư̆ Păh, ki hên cho ối tung khu pơtối pơcháu; mâu tơdroăng tơkêa pro troăng prôk nếo xuân dế tơkôm chêh pro hlá mơ-éa. Pôa Đặng Thái Huy, kăn pơkuâ Khu pơkuâ ngăn tơdroăng pro troăng tơring Čư̆ Păh, kong pơlê Gia Lai ăm ‘nâi, môi tơdroăng ki xơpá cho xua tơdjâk sap ing hnoăng cheăng ‘mot tơkŭm mâu kơ koan, tíu pêi cheăng a tơring.

“Xuân ối xua pơla hdrối kố nah tơdroăng ki ‘mot tơkŭm tíu pêi cheăng tiô hnê mơhno dêi kong pơlê cho pơtê mâu tơdroăng ki pro ƀă ai tơdjâk troh râ cheăm mê khu pơkuâ ngăn xuân hrá ‘no liăn. La ngiâ ah cho a khế 5, khế 6 kố ah khu pơkuâ ngăn kô mơgêi tơdroăng cheăng dêi mâu tíu pêi cheăng xo pro vâ mơdêk tơdroăng cheăng ƀă kơxô̆ liăn ‘no hrê dêi tơring châ mơdêk.

Kong pơlê Gia Lai châ pơcháu túa pơkâ kơxô̆ liăn ‘no pêi cheăng tơbleăng lối 4.500 rơtal liăn, tung mê, ai pơkâ kơlo liăn hrê ăm hơnăm 2025 ƀă kơxô̆ liăn pơtroh sap ing hơnăm 2024. Tung mê, liăn kong pơlê lối 2.600 rơtal, u ối cho liăn Tơnêi têa vâ chê 1.900 rơtal. Laga, troh nôkố xuân ối 12 tơring, pơlê kong krâm tá hâi châ xoăng tâi liăn pro tơmeăm xúa tơdjuôm châ pơcháu, pro kơxô̆ liăn ‘no hrê bu châ lối 10%, ối ai mâu tơdroăng ‘no hrê iâ tâng vâ pơchông ƀă pơkâ mơ’no.

Hlo tơdroăng ki ai khât kố, kong pơlê Gia Lai dế tơbleăng tơdâng tơ’mô hên troăng hơlâ pêi pro kơtăng. Tung mê, mơjiâng 4 tôh pêi cheăng xua mâu phŏ kăn hnê ngăn kong pơlê pơkuâ. Mâu tôh pêi cheăng kố tơkŭm pơkâ pêi hnoăng cheăng ki xo tơnêi, ‘mâi rơnêu túa pơkâ chêl thiê̆n liăn ƀă pêi pro rơkê tung tơdroăng ki xoăng liăn. Ƀă ivá khŏm mơ-eăm khât ƀă tơdroăng ki veăng gum dêi kong pơlê troh tơring, cheăm, Gia Lai dế rế hía rế tŏng gum mâu tơdroăng ki xơpá tung ‘no liăn pro tơmeăm khoăng xúa tơdjuôm. Pôa Rah Lan Chung, kăn hnê ngăn Vi ƀan kong pơlê Gia Lai tối nhên:

“Tơnêi têa dế ai mâu troăng pơkâ tơbleăng pêi tơƀrê mâu tơdroăng tơkêa pro tơmeăm xúa tơdjuôm. Kong pơlê hiăng chêh pro túa pơkâ ƀă ai túa pơkâ tơbleăng túa pơkâ kố. Séa ngăn mơnhên tối ƀă mơhnhôk tơlo liăn rế mơnhông mâu kơxô̆ liăn tơlo tơdâng tơdrêng amê hlối pro tơ’lêi hlâu bă tŏng gum mâu tơdroăng ki xơpá. Ro tiah lâi tâi tâng ki ai hlâu dêi kong pơlê châ mơnhông a kơlo ki hên má môi vâ mơhnhôk tơlo liăn tơdjuôm ivá rơtế ƀă khu kăn pơkuâ kong pơlê vâ pêi pro mâu troăng pơkâ ‘na mơnhông cheăng kâ, kố cho môi tung mâu tơdroăng pêi ki kal”.