Tiô tối tơbleăng dêi Khu xiâm ngăn Túa lĕm tro, Tơ’noăng ivá ƀă Ôm hyô Lâm Đồng, 6 khế apoăng hơnăm kố, Lâm Đồng tơ’mot lối 12 rơtuh tơmối, châ 54% tiô pơkâ ƀă tâk 20% tâng vâ pơchông ƀă hơnăm nah. Tâi tâng kơxô̆ ki kố vâ chê 800.000 ngế tơmối lâp plâi tơnêi, tâk 56%. Tơdroăng tơ’mot pái kong pơlê Lâm Đồng, Bình Thuận ƀă Dak Nông chiâng kong pơlê Lâm Đồng nếo hiăng po hên tơdroăng vâ mơnhông kơvâ ôm hyô xông tơƀrê, tơniăn tiô pơkâ tơdah lối 22,4 rơtuh tơmối tung hơnăm 2025.

Laga, tơdroăng po rơdâ tơnêi tíu pêi cheăng xuân pro hên pơloăng mơnúa ‘na troăng prôk, mơngế pêi cheăng rơkê khât ƀă tơdroăng rơkê pêi cheăng pơla mâu cheăm bêng... Tiô pôa Nguyễn Văn Lộc, Ngế pơkuâ ngăn Túa lĕm tro, Tơ’noăng ivá ƀă Ôm hyô kong pơlê Lâm Đồng tối, kố cho mâu tơdroăng ki pá kal rĕng châ tơmâng tah xơpá. 

“Pin chôa kơchuâ nếo lơ gât ôm hyô dêi Lâm Đồng, la ôh tá xê thế rế hía tâi ki kơnía dêi ôm hyô Đà Lạt, Phan Thiết ôh mê cho vâ pro ăm rế tơbâ pro ăm rế nếo. Pro ti lâi vâ châ tí tăng xo tâi vâ pro xiâm ôm hyô dêi Đà Lạt, ôm hyô Dak Nông hlối tơdjêp ƀă ôm hyô têa kơxĭ, chiâng tơdroăng tơkŭm ôm hyô ing têa kơxĭ, kong ngo chu troh tơbăng. Vâ tơbleăng ôm hyô thế tơtro tâi tâng, malối cho ‘na tơmeăm khoăng hngêi trăng. Vâ tối Đà Lạt - Phan Thiết, Đà Lạt - Gia Nghiã ing kơ’nâi châ tơleăng lĕm troh nôkố pin xuân ối prôk mâu troăng ton. Púi vâ la ngiâ  kong pơlê kô ‘no liăn pro mâu troăng kân kố”.

Klêi tơ’mot tơdjuôm kong pơlê nếo, Vi ƀan Kuăn pơlê kong pơlê Lâm Đồng pơkâ thế Khu xiâm ngăn Túa lĕm tro, Tơ’noăng ivá ƀă Ôm hyô tơrŭm ƀă Khu xiâm ngăn Khoa hok ƀă Kŏng ngê̆ tăng ‘nâi plĕng ƀă mơjiâng mâu troăng rơhlâ tơ’lêi vâ pơtối pêi mâu tơdroăng pơxúa ăm tơmối, mơnhông kơvâ ôm hyô xông tơƀrê. Tiô pơkâ thế dêi Khu xiâm Khoa hok ƀă Kŏng ngê̆ kong pơlê Lâm Đồng, ki hdrối, kong pơlê tơ’mot mâu Kong điê̆n tưh ôm hyô rơkê dêi pái kong pơlê ton chiâng môi kŏng điê̆n tưh ôm hyô dêi kong pơlê nếo. Pakĭng mê, tơ’mot tơdjuôm mâu ư̆ng yŭng ôm hyô tung phôn râng kŏng dêi peăng kong pơlê Lâm Đồng ƀă Bình Thuận hdrối nah, mơjiâng môi app ứng dụng tơdjuôm ai veăng tơ’nôm mâu tơdroăng, chêh ‘mot tung kơmăi ‘na ôm hyô dêi kong pơlê Dak Nông. Vâ ‘mâi hơ’lêh ki tơƀrê, mơdêk xúa ăm tơmối ôm hyô, ư̆ng yŭng mê ối tơ’mot AI, tơ’mot ƀă tuăn ngôa rơkê kuăn mơngế hriăn pro ‘mot tung kơmăi. Pôa Võ Thành Công Ngế pơkuâ xiâm Khoa học ƀă Kŏng ngê̆ kong pơlê Lâm Đồng ăm ‘nâi:

“Tơmối a pơlê kong kân Hồ Chí Minh vâ lăm ôm hyô  tiô kơ on veăng rơpŏng hngêi 4 ngế tung 3 hâi, vâi bú po kơmăi chêh lơ tơpui tối a app mê pin hiăng ‘nâi ‘na tơdroăng dêi tơná vâ. App kô chiâng vêh ngăn xêh tơdroăng mê ƀă klêi mê tối ăm ‘nâi:  Hâi hdrối prôk troh alâi, a tíu ki lâi, drăng lâi, to rơxế klâi ƀă hiăng châ ngăn ki klâi ƀă hên ki ê..... Tâng chiâng pêi pro tiah mê, tơmối kô vâ pêi mâu tơdroăng ôm hyô dêi tơná tung kong pơlê”.

Pôa Hồ Văn Mười, Kăn hnê ngăn Vi ƀan Kuăn pơlê kong pơlê Lâm Đồng tối kong pơlê ai tơnêi tíu kân rơdâ vâ mơnhông ‘na túa lĕm tro, tơ’noăng ivá ƀă ôm hyô. Tung mê Đà Lạt tối cho “Lâm Đồng rơpâu reăng”, Bình Thuận tối  “Lâm Đồng têa kơxĭ drêh”, Dak Nông tối cho”Lâm Đồng tơbăng ngo kân”. Tâi tâng mâu tơmeăm ki ai hlâu rơdêi, tơmeăm khoăng kân kĭn mê kal thế tơrŭm tơdâng tơ’mô, tơtro khâp hlối pêi tơdrêng mê kơvâ ôm hyô dêi kong pơlê nếo châ mơnhông rơdêi ƀă krá tơniăn ton.

“ ’Nâi Lâm Đồng ai tơnêi hnê Túa lĕm tro, Tơ’noăng ivá ƀă Ôm hyô kân. Tơdroăng ga nôkố nếo pơtối rak ki lĕm tro ton nah ‘na túa lĕm tro, mê ki ti lâi nếo tối cho tơdroăng kal. Tuăn tơmiât kong pơlê ngoh, kong pơlê tơ’mot tơdjuôm ƀă chiâng pái la ôh tá xê ti mê. Pái to kong pơlê môi tiah mơhâu pái to chêng, rơdêi, la mơhâu mê hâi tơdâng tơ’mô. Nôkố kơpong têa kơxĭ drêh ƀă rơpâu reăng vâ tối apoăng ga hiăng hmiân tuăn, la kơpong Dak Nông xua ối pá mê hâi châ mơnhông”.