Pôa Trương Văn Quốc (56 hơnăm), ối a cheăm Ea K’tur, kong pơlê Dak Lak, nếo roê rơxế ô tô 5 to tíu ‘nân ki vâi hiăng xúa. Klêi hiăng klêi pro mơ-éa xo hô sơ apoăng roê a Ƀơrô cheăng Kăn sat gâk troăng prôk, pôa to rơxế vêh a hngêi ƀă troh a tíu pêi cheăng Kŏng an cheăm Ea K’tur vâ pro mơéa xo kơxô̆ ki nếo. Maluâ hiăng hên hơnăm xua ôh tá hlê ‘na rơxế, la pôa Quốc châ kăn ƀô̆ kŏng an hnê ăm nhên khât. Kơnôm mê, tung pơla chêh pro mơ-éa xo kơxô̆ gá chiâng tơ’lêi rĕng. Pôa Trương Văn Quốc tối:

“Á châ kăn ƀô̆ kŏng an cheăng ‘na chêh mơ-éa hnê á chêh pro mơéa xo kơxô̆ rơxế tung phân mêm, chêh ‘na nâp hnoăng liăn mơhá ƀă ngăn kơxô̆ kơxêng, kơxô̆ kơmăi. Nôkố, á hiăng nâp liăn hnoăng mơhá, tiê kơxô̆ ƀă vâi tơhrâ tơkôm 2 – 3 hâi. Tối tơdjuôm khu kŏng an cheăm hnê nhên khât ăm kuăn pơlê, mơ-éa châ chêh pro rĕng ƀă tơ’lêi”.

Ngoh Nguyễn Minh Tuấn, ngế cheăng môi khu mơdró kâ tê rơxế ô tô a Dak Lak ăm ‘nâi, rêm khế tíu kố tê dâng 40 – 50 toăng rơxế nếo. Hdrối nah, mơ-éa pro chêh inâi rơxế ƀă tiê kơxô̆ athế nâp hô sơ a kŏng an kong pơlê lơ a tơring, gá chiâng mơdoh hên hâi. Sap ing khế 3 troh nôkố, túa pêi kố hiăng tơ’lêi hlâu kơnôm phân mêm điê̆n tưh, tơdjêp ƀă kŏng an cheăm ƀă mâu tíu tê. Tơdroăng chêh inâi pro kơxô̆ rơxế nôkố bu to lâi chôu tê hiăng klêi, kuăn pơlê xo kơxô̆ klêi 2 – 3 hâi, teăng ăm athế tơkôm plâ măng tĭng ƀă tơbriât dêi rơpó môi tiah hdrối nah.

“Nôkố ôh ti êa kúa kơxô̆ kơxêng, kơxô̆ kơmăi môi tiah hdrối nah, xua hngêi kơmăi vâi hiăng krâ hlâu phĭu kơxô̆ kơxêng, kơxô̆ kơmăi tung hô sơ. Tơmối bu kal tơbleăng mâu tơdroăng kal krê cho căn cước công dân, app định dạng kơlo 2, vâ ngin chêh nâp hnoăng liăn mơhá vâi kô ai tin nhăn pơtroh ăm ing phôn. Mê vâi nâp xêh liăn mâ lơ pơtroh ing tài khoản, klêi mê tiê kơxô̆ amê hlối tung phôn ing phân mêm. Tơdroăng tiê kơxô̆, chêh nâp liăn hnoăng mơhá, bu 2 – 3 chôu tê hiăng klêi mâu mơ-éa. Kuăn pơlê chêh pro mê tíu pơtroh kơthô kô pơtroh ăm kơxô̆ rơxế troh a hngêi”.

Thượng úy Nguyễn Tất Diệu, kăn ƀô̆ pơkuâ ‘na chêh inâi pro mơ-éa rơxế Kŏng an cheăm Ea K’tur tối, rêm khế tíu cheăng kố pro dâng 200 hô sơ rơxế honđa ƀă 60 hô sơ rơxế ô tô, kơmăi kui, kơmăi gu tơnêi ƀă hên ki ê. Klêi tah lôi kŏng an râ tơring (ing lơ 1/3), tâi tâng mâu hlá mơ-éa pro ki nếo, pơhlêh ki ton, pơhlêh inâi rơxế ƀă hên ki ê pơrá châ pro ing phân mêm ƀă phôn râng kŏng ki rơkê. Ing hâi lơ 1/7 kố nah, tíu cheăng châ thăm pơtroh tơ’nôm kăn ƀô̆ mê cheăng tơdah xo hô sơ ƀă pro mơ-éa chêh inâi rơxế tơ’lêi hlâu tâ. Thươ̆ng ŭi Diệu tối tiah kố, drêng kuăn pơlê hmâ ƀă chêh inâi ing măng, pro mâu mơ-éa, tơdroăng ki pro mơ-éa hbru ăm kơxô̆ rơxế chiâng rế tơ’lêi hlâu tâ nếo:

"Rơxế nôkố châ inâi pro tơdrêng ing troăng hyôh internet ing apoăng hlối. Drêng roê rơxế a tíu ki vâi tê, kuăn pơlê nâp hnoăng mơhá online a phôn; kơ koan kŏng an kô tơdah xo hô sơ, chêh pro klêi ƀă pơtroh ăm vâi. Kuăn pơlê bu kal tơkôm ƀă chêh inâi pro mơ-éa a hngêi. Ƀă rơxế ki ton, rơxế ki pơhlêh inâi, rơxế ki tê ăm ngế ki ê lơ pơhlêh mâu tơdroăng,, kuăn pơlê athế djâ hô sơ ƀă rơxế troh vâ ngin ngăn. Tâng rơxế ôh tá tro pong kơxô̆ khung, kơxô̆ kơmăi, mơngiơk sơng ôh tá pơhlêh tâng vâ pơchông ƀă hô sơ xiâm mê kô châ kĭ pro ƀă hnê túa ki pro mơéa chêh inâi rơxế môi tiah rơxế ki nếo”.

Klêi kơ’nâi tơdế khế ‘mot tơkŭm kong pơlê, Dak Lak pơtối ai tơ’nôm lối hrĭng ô tô ƀă mô tô châ chêh pro inâi ki nếo. Maluâ rơxế chêh pro mơ-éa rế hía rế hên, ngế cheăng tá hâi ai tŭm, la ƀă hiâm mơno pôu râng hnoăng ƀă tŏng gum, Kŏng an kong pơlê Dak Lak ối rak vế tơƀrê cheăng chêh inâi pro mơ-éa rơxế. Mâu pơhlêh nếo tung pơhlêh kơxô̆ ôh ti xê pro iâ hâi, kơdroh liăn prôk lăm, mê ối mơhno nhên hiâm mơno “xua Kuăn pơlê chiâng pêi”.