Dak Lak nôkố ai dâng 41.000 ha sầu riêng, ƀă plâi gá tiô tối hdrối hơnăm kố châ dâng 400.000 tâ̆n, tâk hên tâng vâ pơchông ƀă mâu hơnăm hdrối. Khu xiâm ngăn chiâk deăng ƀă Hyôh kong prâi kong pơlê Dak Lak hiăng tơrŭm ƀă Khu ngăn plâi sầu riêng ƀă mâu khu mơdró, khu pêi cheăng tơrŭm, mơdêk séa ngăn vâ ‘nâi ki lĕm lơ ôh, xo ngăn túa mơnhên hôm ai hên pơkeăng, tơhrâ ôh tá xôh mâu pơkeăng ki mơdât oh tá ăm xúa, malối séa ngăn kơtăng mâu trếo ki pro trĭng ƀă cadimi.

Khu ngăn plâi sầu riêng Dak Lak xuân hnê tối kuăn pơlê pôi tá tê plâi ối kơbâng drêng hâi troh hâi khế krí, vâ ví ki ôh tá mơhúa tro  hjip yă lơ hía ki loi tơngah păng ‘nâng.