Kơxê lơ 16/7, pôa Trần Hồng Hà, Phŏ Ngế pro xiâm hnê ngăn tơnêi têa pơkuâ po rôh hôp ‘no tơdrêng ing um tơvi hlối ‘no tơdrêng ing troăng hyôh internet a 22 to kong pơlê, pơlê kong kân vâ hmâng tối tơbleăng ‘na pơkâ mơ’no ‘mot tơ’nôm tơdroăng tơkêa Luât ‘mâi pơhlêh, ‘mot tơ’nôm mâu tơdroăng dêi mâu Luât tung kơvâ pêi chiâk deăng ƀă kong prâi tung Tơdroăng luât hơnăm 2025 dêi Kuô̆k hô̆i hneăng 15.

Tơdroăng tơkêa Luât ‘mâi pơhlêh, ‘mot tơ’nôm mâu tơdroăng dêi 16 Luât tung kơvâ pêi chiâk ƀă kong prâi cho pái khu ki kal: ‘mâi pơhlêh, ‘mot tơ’nôm vâ klâ xoăng khu tơrŭm kơ koan cheăng, kăn pơkuâ kong pơlê péa râ ƀă xoăng hnoăng, xoăng râ; pro tơ’lêi hlâu mâu mơ-éa chêh pro, pro kơdroh tơdroăng ki ‘no liăn cheăng tê mơdró ƀă tăng cheăng pêi tơdrêng tơdroăng kal pêi pro tơdrêng, tơvâ, ôh tá tơniăn trâm sap ing ki ai khât.

Mơgêi rôh pêi cheăng, pôa Trần Hồng Hà, Phŏ Ngế pro xiâm hnê ngăn tơnêi têa pơkâ thế Khu xiâm ngăn chiâk deăng ƀă kong prâi tơmâng xo tŭm mâu rơkong tơpui dêi mâu kăn pơkuâ kong pơlê, khu xiâm kơvâ cheăng, rĕng chêh pro klêi tơdroăng kal kơxop mơéa Luât. Pakĭng mê khu tơdroăng ki kal châ ‘mot tung tơdroăng tơkêa Luât, Phŏ Ngế pro xiâm hnê ngăn tơnêi têa pơkâ thế hbrâ rơnáu kơxop Mơ-éa Pơkâ dêi Chin phuh vâ tŏng gum mâu tơdroăng xơpá, tơvâ tơvân teăm tơdrêng tung kơvâ pêi chiâk, kong prâi.