Vâ mơdêk rơdêi tung tơdroăng pơ’lêh kơxô̆ tung kơvâ cheăng tơnêi têa, veăng ‘no hnoăng pêi pơxúa rak ngăn tơnêi têa, pêi cheăng pơ’lêh tiô túa nếo tung pêi cheăng pro hlá mơ-éa vâ pro xiâm ki mơnhông cheăng kâ-rêh ối, Hâi lơ 17/7, a Hà Nội po Hôp tơpui pơ’lêh kơxô̆ kơpong cheăng ăm tơnêi têa - xiâm ki mơnhông cheăng kâ pơlê pơla xua Hlá tơbeăng Điê̆n tưh Rơ’jíu xiâm Việt Nam tơkŭm po.

Tung pơla pơ’lêh nếo cheăng ƀă kơmăi kơmok 4.0 dế po rơdêi, pơ’lêh kơxô̆ chiâng xiâm tung tơdroăng mơdêk ki tơƀrê rak ngăn Tơnêi têa, pơ’lêh cheăng tiô túa nếo ‘na pro hlá mơ-éa ƀă mơnhông cheăng kâ rêh ối pơlê pơla. Tơdroăng xúa ứng dụng kŏng ngê̆ xô̆ a kơpong pêi cheăng dêi tơnêi têa ôh tá xê to vâ pơ’lêh  tơdroăng cheăng dêi mâu kơ koan Tơnêi têa, mê ối pro hlâu ăm khu mơdró ƀă kuăn pơlê ki châ xúa pêi cheăng ƀă kơmăi.

A rôh hôp, pôa Phạm Mạnh Hùng-Phŏ pơkuâ xiâm Rơ’jíu Việt Nam tối nhên, pơ’lêh kơxô̆ po rôh ăm tơdroăng pêi cheăng tơƀrê vâ xông rơdêi, chiâng môi tơdroăng mơ-eăm ‘mâi mơnhông cheăng kâ, pơ’lêh tơdroăng rak ngăn pơlê pơla ƀă mơdêk ki pơxúa ăm kuăn pơlê, khu mơdró. Malối kơpong pêi cheăng dêi tơnêi têa  ƀă hnoăng  mơhno troăng dế pêi pro tiô pơkâ thế pơ’lêh nếo, hmâ hlối mơdêk rĕng ki mơnhông cheăng kâ rêh ối pơlê pơla.