Hâi lơ 28/8, a Tíu pêi cheăng xiâm Đảng, Tôh pêi cheăng kơxô̆ 2 dêi Khu xiâm kal kí xua pôa Phạm Minh Chính, Ngế pro xiâm hnê ngăn tơnêi têa pơkuâ roh pêi cheăng ƀă Khu pơkuâ tơdroăng cheăng Đảng pơlê kong kân Hải Phòng ƀă Tĭnh ŭy Quảng Ngãi, veăng tơpui mơ-éa chêh hdrối mơ-éa ki kal ƀă tơdroăng tơkêa bro mơngế pêi cheăng Đảng tơbleăng Hneăng hôp Đảng ƀô̆ hneăng hơnăm 2025 – 2030. Mơgêi, Pôa Phạm Minh Chính, Ngế pro xiâm hnê ngăn tơnêi têa hiăng môi tuăn ƀă mơ-éa chêh hdrối mơ-éa ki kal tơbleăng Hneăng hôp Đảng ƀô̆ Hải Phòng ƀă Quảng Ngãi tung hneăng la ngiâ, tơdrêng amê tối nhên tơdroăng ki tá hâi tŭm, xiâm kối ƀă xo vế túa ki rơkê tơtro.

Troăng pêi cheăng la ngiâ, pơkâ xiâm, hnoăng cheăng hneăng hơnăm 2025 – 2030 hiăng mơhno tơdroăng khŏm mơ-eăm kal kí, tơmiêt troăng pêi la ngiâ mơnhông mơdêk ƀă pêi inhên troăng pêi la ngiâ ki kân dêi Đảng. Ngế pro xiâm hnê ngăn tơnêi têa pơkâ thế khu râ kăn pơkuâ hnê ngăn cheăng Đảng 2 kong pơlê tơmâng xo rơkong tơpui, kêi đeăng mơ-éa ki kal, tơdroăng pêi inhên pơkâ pêi, hnoăng cheăng, xiâm kối, pôu râng hnoăng cheăng, kô chiâng pêi pro klêi kơ’nâi Hneăng hôp.