Lâp tung kong pơlê nôkố pro vâ chê 6.000 túa “pêi cheăng hnê mơhnhôk rơkê” tung hên kơvâ cheăng, pro pơxúa khât hlối tơbleăng troh lâp lu. Tung mơnhông cheăng kâ-pơlê pơla ai túa pêi cheăng mê cho: Păn ro kơdrâi ăm ai kuăn”, “Pêt nhâ păn pu pái”, “Pêt kơphế  tơvât tung kơdrum”, “Tâp trăng krâ on bâ eăng troăng pơlê”, lơ “Droh rơtăm pleăng hnoăng tơná pơ’lêh kơxô̆”.

Tung kơvâ cheăng lêng - kring gak tơniăn, ki tơƀrê hôm cho túa “Tôh kring vế tơniăn”. “Droh rơtăm lăm pleăng hnoăng tơná kring tơniăn pơlê pơla, tơpâ on chếo, tŏng xo mâu ngế xía vâ hliăng tiâ”... bă hên  ki ê. Mâu túa pêi pro hiăng pơtối rak hnoăng cheăng kăn ƀô̆, mâu lêng ƀă kuăn pơlê tung mơnhông cheăng kâ-kring vế tơniăn tíu tơkăng kong tơnêi têa.