Tiô tối tơbleăng, mâu hơnăm hdrối nah, kong pơlê Dak Lak hiăng ai hên troăng hơlâ tŏng gum, tơdroăng gum vâ pro ai mâu ngế cheăng a kong pơlê rơkê châ tiô tơdroăng púi vâ ‘na mâu ngế cheăng ăm mơjiâng mâu kơvâ cheăng ki kal. Pơla hơnăm 2021 – 2024, kong pơlê hiăng ‘no lối 28 rơpâu rơtal liăn ăm tơdroăng ki hnê mâu ngế cheăng, châ lối 35% tung tâi tâng liăn ngân dêi kong pơlê. Troh nôkố, lối 64% ngế kăn ƀô̆, kong chưk, viên chưk ngế pêi cheăng hiăng châ hnê.

A rôh pêi cheăng, Vi ƀan hnê ngăn kong pơlê Dak Lak pâ thế Khu xiâm ngăn kong pơlê, tơring cheăm ƀă hnoăng cheăng mâu kăn ƀô̆ rĕng pơtroh hnê mơhno tơdroăng tơkŭm, tíu pêi cheăng Tơnêi têa; mơjiâng tíu ‘măn rak tơdroăng kal tơnêi têa ‘na mâu ngế ki rơkê Việt Nam. Pakĭng mê, mâu khu xiâm kơvâ cheăng ki tơdjâk kal mơjiâng troăng tŏng gum vâ mâu khu mơdró kâ ai hnoăng cheăng pôu râng veăng tung tơdroăng hnê cheăng; ai troăng hơlâ tơ’mot mâu thái cô ki rơkê, khu ki rơkê, kih sư, kŏng nhân ki rơkê cheăng veăng tung mâu rôh po tơdroăng hnê.