Kố cho Rôh hôp Khu kăn Kuô̆k hô̆i pơkuâ cheăng rôh má 7 dêi hneăng cheăng Kuô̆k hô̆i hneăng 15, tung pơla tâi tâng khu pơkuâ cheăng kal kí dế tơbleăng rĕng mâu hnoăng cheăng pơtối xing xoăng khu tơrŭm kơ koan tơnêi têa. ‘Na kơvâ cheăng kố, pôa Trần Thanh Mẫn, Kăn xiâm hnê ngăn Kuô̆k hô̆i ăm ‘nâi, pơla hneăng má 1, mâu khu râ, kơvâ cheăng, kơ koan hiăng xing xoăng tơkŭm kơ koan cheăng, pơla hneăng má 2 pêi pro ‘mâi rơnêu Luât, ‘mâi rơnêu mâu tơdroăng luât ƀă xing xoăng 50% mâu tíu pêi cheăng dêi kong pơlê. Hneăng hôp má 9 tiô tối hdrối hôp tung vâ chê 2 khế, tung pơla nôkố kô xo rơkong tơpui tối dêi kuăn pơlê ‘na ‘mâi rơnêu luât. Malối, sap ing mơ’nui khế 4 troh apoăng khế 5, Vi ƀan pơkuâ cheăng Kuô̆k hô̆i kô hôp hên rôh hôp vâ xoăng tíu pêi cheăng râ cheăm. Pôa Trần Thanh Mẫn, Kăn xiâm hnê ngăn Kuô̆k hô̆i tối nhên:

“Mâu tơdroăng pêi pro tơƀrê, mơnhông tung kơvâ mơjiâng luât a Hneăng hôp má 7, má 8 ƀă hneăng ki ôh tá tiah hmâ má 9 pơla kố nah hiăng tối rơdêi tơdroăng ki tơtro dêi troăng pơkâ pơhlêh nếo túa tơmiât pêi tung tơdroăng mơjiâng luât xuân môi tiah ki pơxúa kal dêi mâu Rôh hôp ‘na tơdroăng kuăn pơlê ƀă tơdroăng Kuô̆k hô̆i pơcháu tung tơdroăng ki rak vế ki tro ‘ló mâu kơxop mơéa vâ pơtroh ăm Kuô̆k hô̆i. Á pơkâ thế, kal pơtối tơmâng xo, ‘nâi nhên ƀă pêi tơƀrê troăng pơkâ pơhlêh nếo túa tơmiât pêi mơjiâng luât, vâ rĕng ăm troăng pơkâ dêi Đảng châ xúa khât tung tơdroăng rêh ối. Mâu luât kal iâ ‘nâng ‘nâi, xêt tơƀrê, mơdêk rơdêi tơdroăng xoăng râ, xoăng hnoăng. ‘Na pơkâ mơjiâng luât, kơ koan ki pơtroh chiu pôu râng troh tui lui ƀă mâu kơxop mơéa luât tá troh drêng Kuô̆k hô̆i tiê nut tơbleăng”.

A rôh hôp, mâu kăn Kuô̆k hô̆i ki bu pêi cheăng ‘na kuăn pơlê ƀă tơdroăng cheăng ki Kuô̆k hô̆i pơcháu hiăng tơpui ‘na tơdroăng tơkêa Luât Kong nghiê̆p kơxô̆. Jâ Nguyễn Thị Thu Nguyệt, ngế ki ối tung khu kăn Kuô̆k hô̆i kong pơlê Dak Lak hiăng môi tuăn ƀă kơxop hlá mơéa luât, ai mâu tơdroăng chêh gá nếo mơhno mâu tơdroăng pơkâ, pơtih kế tơmeăm kơxô̆, mơjiâng pro tơmeăm kong ngê̆ kơxô̆, tê mơdró kong ngê̆ kơxô̆ ƀă hên ki ê. Veăng tơpui nhên tung kơxop hlá mơéa luât, jâ Nguyễn Thị Thu Nguyệt tối tiah kố, tiô tơdroăng a troăng 10 hiăng mơ’no mâu tơdroăng pơkâ thế rak tơniăn ăm tơdroăng cheăng kong nghiê̆p kơxô̆, la tơdroăng pơkâ ‘na gâk kring măng ƀă rak vế mơéa mâu tơdroăng ki kal ối bô bối, tá hâi nhên ‘na tơdroăng pơkâ tro dêi kih thuât ƀă tung pơla rak ngăn:

“Tung pơhlêh kơxô̆ rế hía rế mơnhông tơƀrê mê mâu hlá mơéa tơmeăm ki kal dêi ngế krê ƀă tơdroăng ki kal dêi khu mơdró kâ hiăng chiâng môi tơmeăm ki kơnía git, tơdrêng amê xuân cho tơdroăng ki vâ pro rơ-iêo dêi mâu tơdroăng mơnhâu sap ing pa gong. Tơdroăng ki ôh tá ai tŭm mâu kih thuât, tung pơla séa ngăn krá tơniăn kô tơdjâk troh mâu tơdroăng ôh tá mơhúa, hía hói, châ vâi ‘nâi lơ tro vâ ‘nhiê mot tung mâu tơdroăng ki kal, xua mê á pơkâ thế mâu khu ki chêh pro athế pơkâ mâu tơdroăng pơkâ pêi tro nhên ‘na gâk kring măng ƀă mâu pơkâ kố ngăn tung mâu tơdroăng pơkâ dêi lâp plâi tơnêi xuân môi tiah mâu tơdroăng pơkâ pêi xua Khu xiâm ngăn Kŏng an ƀă Khu xiâm ngăn khoa hok ƀă Kong ngê̆ hiăng pơkâ hdrối nah”.

Ƀă pôa Phạm Trọng Nghiã, Khu kăn Kuô̆k hô̆i kong pơlê Lạng Sơn pơkâ thế:

“Séa ngăn tơ’nôm luât pơkâ mơnhông kơmăi kơmok kŏng ngê̆ xô̆ vâ pro tơniăn  hnoăng pơkuâ tơnêi têa tung măng, tơniăn tung măng, tơniăn ‘na tơdroăng ki kal chêh ‘măn tung kơmăi, tơniăn tơdroăng dêi khu tơrŭm cheăng ƀă mơngế. Kố cho 1 tung  5 tơdroăng ki kal  tung tơdroăng pơkâ kơxô̆ 57. Má péa, pơkâ thế séa ngăn tơ’nôm luât pơkâ vâ kơdroh ki kơtăn hơngế vâ rêm ngế kuăn pơlê, malối cho khu ki oh ta rơhéa môi tiah hdroâng kuăng ngo a  kơpong hơngế, hơngo, kơpong xơpá châ xúa ing mơnhông tơƀrê dêi kơmăi kơmok kŏng ngê̆ kơxô̆ vâ pôi ta lôi ngế ki lâi pá rŏng tung pơla mơnhông cheăng kơmăi kơmok kŏng ngê̆ kơxô̆ a tơnêi têa pin.

Pơtối tơmâng ƀă tối nhên mâu tơdroăng dêi mâu Kăn Kuô̆k hô̆i  tâng, pôa Nguyễn Mạnh Hùng, Ngế xiâm pơkuâ Khu xiâm Khoa hok ƀă  kŏng ngê̆ tối, Đảng ƀă Tơnêi têa hiăng ‘nâi nhên tơdroăng cheăng ƀă kơmăi kơmok cho kơmăi kơmok xiâm,  kô pêi tơtro ƀă tơmeăm khoăng Việt Nam, ai pơxúa pơkâ mơnhông cheăng kâ kơxô̆ ƀă pơlê pơla tối tơdjuôm tung  chal nếo.

Tơbleăng a rôh mơgêi hneăng hôp, pôa Trần Quang Phương phŏ kăn hnê ngăn Kuô̆k hô̆i tơmâng xo, khê̆n kơdeăn tơdroăng veăng hôp tŭm, ‘nâi hnoăng pêi tơná dêi mâu kăn Kuô̆k hô̆i ki pêi mâu tơdroăng cheăng, mâu kơ koan tơrŭm cheăng. Mâu kăn Kuô̆k hô̆i ki pêi mâu tơdroăng cheăng ăm ra kơpêng hiăng hbrâ  tơdroăng kal, mâu tơdroăng veăng hnê tối tung mơjiâng tơpui ‘nâng ‘nâi, tơdroăng ki tro,rah to tơdroăng kal./.