Mơ’nui hơnăm nah, Khu xiâm pơkuâ tơdroăng kal kí hiăng pơkâ tơdroăng Pơkâ kơxô̆ 57 ‘na mơnhông tơƀrê xúa khoa hok, kong ngê̆, pơhlêh nếo tơmiât pêi rơkê ƀă pơhlêh kơxô̆ tơnêi têa. Klêi kơ’nâi mê, a Hôngêi hôp kân Diên Hồng hiăng po Rôh hôp lâp tơnêi têa pơkâ xúa tơdroăng Pơkâ 57, pôa Tô Lâm, Kăn xiâm pơkuâ hnê ngăn cheăng Đảng hiăng ai ƀai pơchuât hnê mơhno ki kal a Rôh hôp ƀă pôa Trần Thanh Mẫn, Kăn xiâm hnê ngăn Kuô̆k hŏi xuân pơchuât tơbleăng ‘na tơdroăng ki kal kố. Đảng đoân Kuô̆k hô̆i pơkâ Túa pơkâ kơxô̆ 3260 vâ pêi Pơkâ kơxô̆ 57.

A Hneăng hôp ôh ti xê tiah hmâ rôh má 9, Kuô̆k hô̆i hiăng séa ngăn, tơbleăng Pơkâ kơxô̆ 193 ‘na mâu troăng hơlâ pơkâ, tŏng gum pro mơnhông tơƀrê khoa hok, kong ngê̆, pơhlêh nếo tơmiât pêi rơkê ƀă pơhlêh kơxô̆ tơnêi têa. Kố cho tơdroăng pơkâ vâ tŏng gum mâu tơdroăng ki trâm ahdrối, ‘na ton xŏn kô ‘mâi pơhlêh mâu luât vâ mơdêk rơdêi kơvâ cheăng khoa hok, kong ngê̆.

Tơpui a Rôh hôp, pôa Trần Thanh Mẫn, Kăn xiâm hnê ngăn Kuô̆k hô̆i tối nhên, Pơkâ kơxô̆ 57 pơkâ pêi troh hơnăm 2030, Việt Nam ối tung top 3 tơnêi têa ki djâ troăng ahdrối Đông Nam Á, top 50 to kong têa ối má môi lâp plâi tơnêi ‘na ivá tơxup kơxô̆ ƀă kơlo kơxô̆ mơnhông Chin phuh điê̆n tưh. Việt Nam tơngah pơxá top 3 tơnêi têa djâ troăng ahdrối Đông Nam Á ‘na hriăn plĕng ƀă mơjiâng tuăn ngo kuăn mơngế mơjiâng pro. Pôa Trần Thanh Mẫn, Kăn xiâm hnê ngăn Kuô̆k hô̆i pơkâ thế Kuô̆k hô̆i tơkŭm pơkâ xúa, pêi pro mâu tơdroăng ki kal môi tiah:

“Mơjiâng xúa khoa hok kong ngê̆, pơhlêh nếo tơmiât pêi rơkê, pơhlêh kơxô̆ cho tơdroăng ki kal, ki xiâm vâ mơjiâng Kuô̆k hô̆i rơkê plĕng, tơniăn krê, tơdrăng, rơkê, khoa hok ƀă tơƀrê. Tuăn ngoâ ki mơjiâng pro kô chiâng ngế tŏng gum xiâm ăm Kuô̆k hô̆i séa ngăn, mơ’no tối mâu pơkâ troăng hơlâ tŏng gum ki tro, pêi pro châ tơdroăng púi vâ tung tơdroăng xúa ki ai khât, mơdêk ki tơƀrê tung séa ngăn ƀă tơdjêp tro tâ ƀă kuăn pơlê. Kuô̆k hô̆i kal prôk ahdrối tung tơdroăng ki pro hngêi trăng, troăng klông, xúa khoa hok, kong ngê̆ hnê mâu ngế cheăng rơkê xúa tung pơhlêh kơxô̆ tơnêi têa. Pêi pro rĕng, tơƀrê mâu Pơkâ, tơdroăng tơkêa hiăng pơkâ ƀă Kuô̆k hô̆i; hnê cheăng, hbrâ rơnáu tŭm mâu tơdroăng xúa kơxô̆, gum mâu kăn Kuô̆k hô̆i ƀă kăn ƀô̆, kong chưk, viên chưk ối tung mâu kơ koan dêi Kuô̆k hô̆i xúa kong ngê̆ rơkê plĕng, mơ-eăm mơjiâng ivá xúa tuăn ngoâ kuăn mơngế mơjiâng pro vâ gum Kuô̆k hô̆i pêi cheăng”.

Kăn xiâm hnê ngăn Kuô̆k hô̆i pơchân, kal thăm mơdêk tơdroăng ki hriâm ƀối ki rơkê plĕng ƀă mơnhông tơrŭm hriăn ngăn ƀă hnê tối ‘na kong ngê̆ ƀă mâu kong têa ki rơkê plĕng tung kơvâ tuăn ngoâ mơjiâng pro, kong ngê̆ kơxô̆ ki rơkê plĕng tung tơdroăng cheăng kuô̆k hô̆i râ má môi, vâ mơnhông mâu troăng hơlâ ƀă tơdroăng ki ai khât dêi Kuô̆k hô̆i Việt Nam.

Kăn xiâm hnê ngăn Kuô̆k hô̆i tối, a Hneăng hôp má 9, a khế 5 la ngiâ kố ah, Kuô̆k hô̆i kô séa ngăn ăm rơkong veăng tơpui tối ‘na Luât Khoa hok, kong ngê̆ ƀă pơhlêh nếo tơmiât pêi rơkê; séa ngăn tơbleăng Luât Kong nghiê̆p kong ngê̆ kơxô̆, vâ tŏng gum mâu tơdroăng ki xơpá, mơdât, po troăng ăm mơnhông khoa hok, kong ngê̆, pơhlêh nếo tơmiât pêi rơkê, pơhlêh kơxô̆ tơnêi têa.

Tơpui tơno a rôh hôp môi tơdroăng ki kal, pôa Nguyễn Mạnh Hùng, ngế xiâm ngăn Khoa hok ƀă Kong ngê̆ tối tiah kố, tung Pơkâ 57, khoa hok kong ngê̆, pơhlêh nếo, tơmiât pêi rơkê cho tơdroăng ki khŏm pêi, cho rôh tơ’lêi vâ Việt Nam chiâng tơnêi têa mơnhông.

“Ƀă tơdroăng mơnhông cheăng kâ pơklât thế ai mâu tơdroăng pơkâ hiâm mơno kăch măng ƀă Pơkâ 57 cho môi túa xúa ki rơkê tơtro. Túa tơmiât hnê mơhno mê, ai pái tơdroăng ki xiâm vâ mơnhông tơnêi têa. Vâ pôi tá ton tơrŏng, vâ mơnhông tơƀrê, vâ tơkâ luâ mâu tơdroăng ki pêi lo liăn iâ, kố cho troăng prôk ki tro ‘ló. Mê pin ngăn môi tiah môi rôh kăch măng ki trâu rơdâ ƀă tŭm têk. Việt Nam hmâ ƀlêi chiâng ƀă mơnhông rơdêi drêng pơhlêh chiâng môi rôh kăch măng tâi tâng kuăn pơlê ƀă tŭm têk”.

Rôh hôp môi tơdroăng ki kal “Kuô̆k hô̆i kơxô̆ ƀă xúa kong ngê̆ tuăn ngoâ rơkê ki kuăn mơngế mơjiâng pro tung pơhlêh kơxô̆ dêi Kuô̆k hô̆i” hiăng tối nhên ivá khŏm mơ-eăm dêi Kuô̆k hô̆i tung tơdroăng ki prôk ahdrối tung pơhlêh kơxô̆, xúa khoa hok, kong ngê̆ vâ mơnhông tơƀrê tơdroăng cheăng. Mâu tơdroăng pơkâ pêi ki kân tung Pơkâ 57 ƀă mâu pơkâ ki tơdjâk ôh ti xê to tơmiât troh tơdroăng mơnhông tơƀrê tung kơvâ khoa hok, kong ngê̆, pơhlêh nếo, tơmiât pêi rơkê ƀă pơhlêh kơxô̆ tơnêi têa, mê ối pơkâ tơdroăng ki xiâm krá rơdêi ăm môi Kuô̆k hô̆i rơkê plĕng, tơdrăng, rơkê tâ.