Mâu hâi hiăng hluâ, mâu tơring tung kong pơlê Dak Nông hiăng rơtế pơxiâm mơjiâng pro chât toăng hngêi kum kuăn pơlê ai tơdroăng rêh ối pá puât.

Kong pơlê Dak Nông mơ-eăm troh khế 9 la ngiâ kô pêi kêi đeăng tơdroăng têa tah 540 hngêi pơtân, hngêi xi kơchoh pro ăm hngêi nếo.

Tiô tơdroăng tơkêa bro, tung hơnăm 2025, kong pơlê Dak Nông kô pêi pro mơjiâng 540 toăng hngêi nếo diâp mâu rơpŏng kơtiê, vâ chê kơtiê, kuăn pơlê mâu hdroâng kuăn ngo ƀă rơpŏng ai hnoăng tơnêi têa. Rêm toăng hngêi nếo châ tŏng gum 60 rơtuh liăn. Tâi tâng kơxô̆ liăn pêi pro lối 32 rơtal liăn.

Sap apoăng khế 3 troh nôkố, mâu tơring a kong pơlê Dak Nông hiăng rơtế pơxiâm mơjiâng pro châ lối 30 toăng hngêi gum mâu rơpŏng pá puât ‘na hngêi ối. Kong pơlê mơ-eăm troh khế 9 la ngiâ kô kêi đeăng tơdroăng têa 540 toăng hngêi pơtân, hngêi xi kơchoh pro ăm hngêi nếo.