Hiăng ai tơring tung kong pơlê têa tah hiăng vâ tâi hngêi pơtân, hngêi xi kơchoh ăm kuăn pơlê. Kon Rẫy cho tơring ki apoăng dêi kong pơlê Kon Tum troh nôkố hiăng mơjiâng pro nếo ƀă rơnêu hngêi ton tâi tâng vâ chê 155 toăng hngêi, hngêi xi kơchoh ăm mâu rơpŏng kuăn pơlê. Tung kơxô̆ ki mê kal pro nếo 102 toăng hngêi ‘mâi rơnêu ai 53 toăng.

Pôa Nguyễn Văn Thủy, Kăn phŏ hnê ngăn Vi ƀan tơring Kon Rẫy, ăm ‘nâi, nôkố hiăng ai mâu hngêi thế pro nếo, rơnêu hngêi ton pro klêi, klê mê pơcháu ăm rơpŏng hngêi ối. Tơring mơ-eăm pê klêi tơdroăng tah hngêi pơtân, hngêi xi kơchoh a mơ’nui khế 4/2025. Tơdrêng ƀă tơring Kon Rẫy, a kong pơlê Kon Tum ai tơring Đăk Hà xuân bú ối 9 toăng hngêi ƀă tơring Sa Thầy ối 34 toăng hngêi. Ƀă mâu tơring hơngế hơngo, kơtiê xơpá dêi kong pơlê ai hên hngêi pơtân, hngêi xi kơchoh kal mơjiâng pro nếo ƀă ‘mâi rơnêu, mê cho: Tơring Đăk Glei 646 toăng hngêi, Kon Plông 572 toăng hngêi, Tu Mrông 423 toăng hngêi, troh nôkố kơxô̆ hngêi pơxiâm mơjiâng pro, pê klêi hngêi ki nếo pro ƀă rơnêu xuân hiăng châ lối tơdế.