Troăng kân tơdrăng lĕm Bảo Lộc - Liên Khương xŏn vâ chê 74km, tơdjêp ƀă 2 pơlê kong kơdrâm Bảo Lộc ƀă Đà Lạt, tơkâ luâ mâu tơring  Bảo Lâm, Di Linh ƀă Đức Trọng dêi kong pơlê Lâm Đồng. Tung lối 17.700 rơtal liăn tâi tâng kơxô̆ liăn tâi tâng kơxô̆ liăn ‘no pêi cheăng ai lối 7.600 rơtal liăn ing liăn ngân Tơnêi têa, ki u ối cho xúa khu mơjiâng pro mơhnhôk tăng.

Tơdroăng tơkêa pro xua Kŏng ti veăng tơlo liăn dêi grup Phương Trang - FUTA GROUP teăng mâ tơrŭm khu mơjiâng pro. Tâi tâng troăng mê ai 51 to kông, tung mê 13 to kông ki xiâm, 35 to kông tơkâ luâ troăng kân tơdrăng ƀă 3 to kông tung tíu ki tơdjêp pơla mâu troăng kân. A Pơkâ kĭ, pôa Trần Hồng Thái, Kăn hnê ngăn Vi ƀan kong pơlê Lâm Đồng pơkâ thế mâu tíu pêi cheăng, kơvâ cheăng ki tơdjâk troh ai hnoăng pêi pro, hnê mơhno tơrŭm séa ngăn pêi tơdroăng tơkêa rak tơniăn tro tiô pơkâ dêi Luât.

Pakĭng mê, thâ mơjiâng mâu kơpong pro pơlê nếo, pro hlá mơ-éa chêl thiăn liăn ki ‘mâi xĕn hngêi trăng, tơnêi chiâk deăng vâ pơxiâm pro troăng kân tung la ngiâ.