Teăng mâ Đảng, Tơnêi têa ƀă kuăn pơlê Việt Nam, pôa Tô Lâm, Kăn xiâm pơkuâ hnê ngăn cheăng Đảng tối châi heăng ‘na tơdroăng ki hlâ lêk lôi dêi pôa Khamtay Siphandone ƀă pơtroh mâu kăn pơkuâ Lếo, tâi tâng kuăn pơlê Lếo ƀă rơpŏng hngêi pôa Khamtay Siphandone rơkong sĭng khéa ó khât.

Pôa Tô Lâm, Kăn xiâm pơkuâ hnê ngăn cheăng Đảng tối nhên, pôa Khamtay Siphandone ôh ti xê to kăn pơkuâ ki kơhnâ rơkê ối tung chal ki apoăng mơjiâng kăch măng Lếo, pơkuâ hneăng kăch măng hdroâng mơngế tơniăn krê hdrối nah ƀă tơdroăng cheăng rak vế ƀă mơnhông tơnêi têa, kăn pơkuâ djâ troăng ahdrối tung tơbleăng troăng hơlâ pơhlêh nếo tŭm têk dêi Đảng Nhân yân Kăch măng Lếo mê ối cho ngế pú ki tơdrăng, tơrŭm tơroâ, ngế pú ki hmâ achê, đi đo rơtế ƀă Việt Nam tung plâ tơplâ rak vế Tơnêi têa ƀă mơjiâng tơnêi têa dêi péa hdroâng mơngế.

Tơdroăng ki hlâ lêk lôi dêi pôa cho môi tơdroăng ki hía kân ƀă Đảng, Tơnêi têa ƀă kuăn pơlê péa tơnêi têa Lếo ƀă Việt Nam. Vâ mơnê tơdroăng veăng gum dêi pôa Khamtay Siphandone ăm tơdroăng mơnhông tơrŭm cheăng hmâ achê, krá tơniăn Việt Nam - Lếo, Đảng, Tơnêi têa Việt Nam pơkâ tơkŭm mơdâm tung 2 hâi sap ing lơ 4 troh lơ 5/4/2025.