Nhuô̆m khât diâp ƀâng kheăn kơdeăn ăm mâu khu pú hên ƀă ngế krê tung khu râ kăn pêi cheăng Khu lêng ƀă Kŏng an veăng tŏng gum tŏng xo mơngế trâm xía vâ, rơnêu tơmeăm khoăng xua tơnêi tơdro a kong têa Myanmar, pôa Phạm Minh Chính, Ngế pro xiâm hnê ngăn tơnêi têa tối, tơdroăng djâ khu ki veăng tŏng xo mơngế hliăng tiâ, tŏng gum mơngế ki tro tơdjâk tơnêi tơdro a Myanmar ai kơnâ, kum mơhno ki râ kăn, tíu cheăng dêi tơnêi têa; pơtâng tối tơdroăng pơtâng hnê tối ‘na tơnêi, kuăn mơngế Việt Nam ai hiêm mơno lĕm, pâ dêi pó, tuăn pâ dêi pó, kum mơngế pá puât, tơrŭm môi tuăn lâp plâi tơnêi ki kơnâ; mơnhên ki loi tơngah, ivá rơkê dêi Việt Nam tung tơleăng ai hnoăng mâu tơdroăng lâp plâi tơnêi, đi đo hbrâ rơnáu tơdjuôm ivá tơleăng mâu tơdroăng pá puât, pơloăng mơnúa.

Ngế pro xiâm hnê ngăn tơnêi têa xuân mơnhên, hơnăm 2025 ƀă tung la ngiâ, mâu pơloăng mơnúa gâk kring ôh tá tiô khôi vâi krâ nah, ki má lối cho tơdroăng kong prâi pro ôh tá tơniă, tơplâ tơplong lâp plâi tơnêi ƀă kơpong rế hía rế ôh tá tơniăn, ôh tá ‘nâi tối hdrối ƀă a tung tơnêi têa, têa kân lân lu, kong tô khăng khoăng, têa xăng po lân mot, tơnêi tơhnah tơhnâp...ƀă pro rế hía rế hên kô chiâng ai, xua mê, kal mơdêk tâ mê nếo kuăn mơngế, gâk kring kuăn mơngế, gâk kring tơniăn tơdroăng rêh ối ăm kuăn pơlê./.