Ƀă tơdroăng pơxá “Kơneăng a ‘ngêi”, Hâi leh khinh khí cầu Dak Lak hơnăm 2025 po sap hâi lơ 1/5 – troh hâi lơ 3/5 a cheăm Krông Na, tơring Buôn Đôn. Hâi leh ai 10 to khinh khí cầu kơneăng ăm tơmối ngăn a Buôn Đôn ƀă 2 Khinh khí cầu tơbleăng a Plông kân lơ 10/3, pơlê kong kơdrâm Buôn Ma Thuột.

Yă vĕ a Buôn Đôn vâ to a khinh khí cầu sap 140.000 troh 800.000 liăn. Pơkâ chôu to kơneăng ing 5  troh 10 phŭt, a ‘ngêi 50 met. Tơdrêng amê, tơmối châ tâ ki hơniâp ro dêi tơdroăng xah hêi trâm mâ - mơhno túa lĕm tro mơđah hơdruê xuăng tiô tơdroăng ton nah, mơnúa kâ kơchâi, kế kâ ki kơhiâm dêi kong pơlê.

Pôa Phạm Trung Nghiã, Kăn hnê ngăn Vi ƀan tơring Buôn Đôn ăm ‘nâi, tơdroăng kố ai hên túa ăm kơneăng vâ tơmối rah túa tơná rơhêng vâ tâ, vâ hlo. Tơdroăng pêi pro mê xua tíu pêi cheăng ki hiăng hmâ ‘na kơvâ kơneăng khinh khí cầu tối tơniăn ‘na kih thuât, tơniăn ăm tơmối ki to kơneăng:

“Kố cho roh apoăng po leh ki kân ƀă mâu túa xah hêi ki lĕm ro tơviah ƀă khinh khí cầu châ tơkŭm po a kong pơlê. Tơdroăng kô ôh ti xê  to xah hêi ngê̆ thuât mê ối cho tơdroăng xah hêi vâ tơdjêp tơbleăng túa lĕm tro, tơmeăm khoăng tíu ôm hyô, malối tơbleăng túa vêa vong lĕm tro mâu hdroâng kuăn ngo Tây Nguyên ăm vâi pú pŭn pâ plâi tơnêi ‘nâi. Ngin loi khât tiah kố, ƀă tơdroăng vâ môi tuăn dêi kuăn pơlê ƀă tơmối, Hâi leh khinh khí cầu tơring Buôn Đôn kô chiâng môi tơdroăng ki hdró vâ chôu pâ troh ta ah, veăng mơnhông Buôn Đôn chiâng tíu troh ki lĕm ro tung lơgât ôm hyô Việt Nam”.

Pakĭng mê, tơmối troh a Dak Lak tung rôh leh lơ 30/4 ƀă lơ 1/5 hơnăm kố ối châ ngăn tơdroăng xah hêi túa lĕm tro, tơ’noăng ivá po a kong pơlê, môi tiah mơđah tŏn chêng, hơdruê prôk drô troăng kơphô̆, mơđah tơbleăng um, xup um kơchuâ, kơchâi kế kâ mâu hdroâng kuăn ngo pế pơchên. Pôa Trần Hồng Tiến, Ngế pơkuâ ngăn Túa lĕm tro, Tơ’noăng ivá ƀă Ôm hyô kong pơlê Dak Lak ăm ‘nâi:

“ Tơdroăng pêi pro mê po tung 4 hâi vâ tơmối troh ƀă ngăn hlo. Pakĭng lăm hyô ngăn a kơhâi, kố châ mot a Buôn Đôn, Lak lơ a mâu tíu ôm hyô ki ê, vâ to ngăn khinh khí cầu a kơmăng mâu hâi ki u ối kô châ ngăn túa lěm tro kơphế, hơdruê xuăng Tây Nguyên ƀă  lăm ngăn mâu tíu tơbâ ton nah, ki lěm tung kong pơlê. Mâu tơmeăm mê ngin hiăng tơrŭm ƀă  khu mơdró vâ tơbleăng pêi pro".