*** Tơdroăng ki rơhêng vâ tối tung mâu hâi hdrối cho Leh tơbâ 50 hơnăm Hâi Tơleăng peăng Hdroh, pro tơnêi têa tơrŭm chiâng môi a hâi lơ 30/4 a Pơlê kong kân Hồ Chí Minh. Rôh leh tơbâ kố kân krip, ƀă tơdroăng ki veăng ai mâ dêi lối rơtuh ngế kuăn pơlê ƀă tơmối kong têa ê. Leh tơbâ 50 hơnăm Hâi tơnêi têa tơrŭm môi ai 48 khu lêng, ƀă dâng 13.000 ngế veăng prôk a troăng. Khu lêng Sinuâ, Lếo ƀă Kul rơtế veăng prôk pơtăng. A leh tơbâ, khu lêng hiăng pĕng 21 to răng on tung idrâp chuât dêi ƀai Quốc ca Việt Nam. Kuân chủng Phòng không – Khu lêng kơnŏng pơtroh lối chât toăng tơƀai trưk thăng, tơƀai tơplâ kơto kơneăng a hbo plêng.

*** A pơlê kong kân Hồ Chí Minh hiăng tơkŭm po chât rôh pĕng mlŏi reăng  ăm kuăn pơlê tung hâi leh dêi tơnêi têa. Kơmăng hâi lơ 30/4 pĕng mlŏi reăng châ a kơlo ƀă 20 điêm pĕng a râ ‘nâng ‘nâi ƀă 2 tíu pĕng a ‘ngêi tung lâp pơlê kong kân. Tơdrêng amê cho mâu tơdroăng mơđah eăng bâ a rơvâ plêng tung kơmăng hâi lơ 26/4 ƀă lơ 30/4 ƀă lối 10.000 tơmeăm kơneăng ôh tá ai ngế vê, mơđah hên ăm hlo pơxá ki tơviah lĕm dêi Pơlê kong kân Hồ Chí Minh tung 50 hơnăm hdrối.

Tơdrêng amê a Pơlê kong kân Hồ Chí Minh po hên hĭn mâu tơdroăng mơđah tơbleăng ngê̆ thuât ki hơniâp ro. Mê cho tíu mơno um tơvi râ tơnêi têa “Vang mãi khúc Khải hòan”. Tơdroăng ngê̆ thuât ki tơviah kố xua Khu xiâm ngăn túa lĕm tro, Tơ’noăng ivá ƀă ôm hyô pơkuâ po, tơrŭm ƀă Pơlê kong kân Hồ Chí Minh tơkŭm po a Dinh Thống Nhất hâi lơ 29/4. Mơđah tơbleăng hlŭm khiê̆n ƀă mâu kih thuât kơto xêi xua Khu xiâm ngăn Kŏng an pơkuâ, po a kơpong troăng Lê Lợi ƀă kơphô̆ prôk chêng Nguyễn Huệ.

*** A Hà Nội, tơdroăng mơđah ngê̆ thuâ̆t chêh hlá tơbeăng “Tơhrâ Peăng Kơnhŏng - Peăng Hdroh” hiăng po a plông kân Tơnêi têa a Mỹ Đình, ai lối 800 ngế ngê̆ sih, diễn viên ƀă mâu lêng hneăng hdrối, mâu ngế ki châ hlo veăng tơplâ mơđah. Tơdroăng kố cho tơrŭm pơla tơdroăng ton nah ƀă, tơdroăng mơnhên rơdâ, mơhno ƀă hên tơdrá hơdruê ƀă hơdruê xuăng mơđah tiô túa nếo nôkố. Malối tung mơđah mê ai 2 toăng rơđế kom ƀa T54, túa rơxế ki xúa tung rôh tơplâ xâ Mih. Tơkêa Peăng Kơnhŏng - Peăng Hdroh ai plông mơđah krip, mê ai khu ki pá kô pá tá mơđah tơbâ 2 pâ Peăng Kơnhŏng - Peăng Hdroh. a tơdế ai kông Hiền Lương. Tơdrêng amê cho kŏng ngê̆ mơđah um 3D mapping rôh apoăng hlo mơđah tung mâu tơdroăng mơđah hơdruê xuăng. 

*** Hdrối mê, a Hngêi hôp kân Thống Nhất (Tíu xối tơbâ tơnêi têa ki tơviah Dinh Độc Lập) po Tơdroăng ngê̆ thuât “Đất nước trọn niềm vui”. Tơdroăng kố ai 3 tơdroăng: “Khát vọng thống nhất”, “Khát vọng vươn lên” ƀă “Khát vọng hùng cường”; châ pro môi tiah sử ca, cho mâu túa hơdruê, xoăng, plông mơđah, thực cảnh, sử thi ƀă hên ki ê. Vêh mơhno mâu hneăng ton nah khên tơnôu dêi hdroâng mơngế, tơnêi têa ƀă tối rơdêi ki kal kân dêi Ƀlêi trâng rơnó Hơngui hơnăm 1975.

*** A Hà Nội, Rơ’jíu xiâm Việt Nam, tơkŭm po tơdroăng mơđah ngê̆ thuâ̆t “ Khúc ca khải hoàn’’ tơdroăng kố ai mơđah 3 pâ” “Hà Nội nghe tin chiến thắng”; “Tiến về Sài Gòn”; “Đất nước sau thống nhất”. Rêm pâ cho môi hơdroăng tối ‘na ton nah, hdró ki hâk tơngăm, tơmiât tơdroăng ton nah dêi môi Việt Nam pơ’hlêh nếo, tơrŭm ƀă mơnhông tơƀrê. Pôa Ngô Thiệu Phong , Ngế xiâm rah chêh hlá tơbeăng Điê̆n tưh Rơ’jiu xiâm Việt Nam tối:

“Tung tơdroăng “Khúc ca khải hoàn”, ngin vâ tơbâ nếo tơdroăng ki ro hâi lơ 30/4/1975 a Rơ’jíu xiâm Việt Nam. Malối cho a veăng thâo hrik dêi rơ’jíu Việt Nam. Mâu ngế ki pơchuât tơdroăng nếo ai ‘na tơplâ ƀlêi trâng lơ 30/4/1875. Mâu ngế ‘nâi mâu tơdroăng apoăng, mâu ngế hâk tơngăm châ tơbleăng tơdroăng dêi tơnêi tá ăm kuăn pơlê ‘nâi, ăm lâp tơnêi têa ƀă lâp plâi tơnêi ‘nâi, tơbleăng môi tơdroăng leh kân dêi tơneie têa cho “Việt Nam hiăng tơniăn lĕm lâp tơnêi têa tơrŭm môi”.