Mơđah tơbleăng troh kuăn pơlê 4 tơdroăng xiâm ki má môi ‘na tơdroăng tơplâ xâ inâi Hồ Chí Minh roh ton nah, ƀă mơhno um, tơmeăm ‘na Pôa Hồ Chí Minh, Kăn xiâm hnê ngăn tơnêi têa hneăng hdrối ƀă tơdroăng cheăng tơleăng lĕm peăng Hdroh Tơnêi têa, tơnêi têa tơrŭm chiâng môi, rơtế mâu tơdroăng châ tơƀrê má môi dêi Pơlê kong kân Hồ Chí Minh mâu hơnăm hdrối mê hía nah.

Mơđah tơbleăng tơkŭm po sap hâi lơ 8/4 troh hâi lơ 20/5, cho môi tung mâu tơdroăng ki xiâm leh tơbâ 50 hơnăm Hâi pro tơleăng lĕm peăng Hdroh Tơnêi têa, pro tơnêi têa tơrŭm chiâng môi (30/4/1975 – 30/4/2025), veăng gum hnê hriâm tiô khôi túa kăch măng, hiâm mơno pâ nhuô̆m tơnêi têa ăm kăn ƀô̆, mâu lêng ƀă kuăn pơlê, ki rơhêng vâ tối cho rơxông ối nếo, veăng kum mơjiâng tơnêi têa mơnhông mơdêk ƀă gâk kring tơnêi têa.

Tung pơla tơkŭm po mơđah tơbleăng, hên tơdroăng châ tâ, châ hlo lĕm ro xuân châ tơkŭm po, môi tiah prôk tơniăn tung tơplâ xâ, chêh bro hlá cơ tơleăng lĕm, kơchâi kâ dêi yu kĭt rơxông tơplâ xâ.