Tung tơdroăng ki kơtăng ƀă phoih ƀriê, 11 ngế kăn ƀô̆ ki pleăng dêi hnoăng lăm veăng tơplâ a peăng Hdroh ƀă nhŏng o vâi cho 22 ngế kăn ƀô̆ ki ê hiăng tơdah xo mâu hồ sơ châ rak vế krâu tung plâ lối tơdế chal. Klêi kơ’nâi leh mơdrếo tơvêh hồ sơ, kong pơlê Gia Lai po rôh mơđah tơbleăng “Mơnhông kơpong tơnêi khêi Bazan”, vêh mơhno rôh tơplâ ƀă mâu pêi pro dêi khu lêng ƀă kuăn pơlê Gia Lai – sap ing Tơkêa Geneva  hơnăm 1954 troh rôh ki tơnêi têa tơrŭm môi, ƀă mâu hvêa chêng prôk pơhlêh dêi tơná rơdêi tung hnoăng cheăng mơnhông hâi kố.

Mơđah tơbleăng kố châ klâ pro 2 tơdroăng cho “Tơkâ luâ mâu rôh tơplâ” ƀă “Mơ-eăm tung kong kế ki kân rơdâ”, vêh mơhno lối hrĭng mâu kế tơmeăm ki kal, um ki kơnía ‘na tung pơla 50 hơnăm tơleăng Gia Lai (17/3/1975) ƀă 50 hơnăm tơleăng peăng hdroh (30/4/1975) pro tơnêi têa tơrŭm môi.