Tung chôu phut sôk ro tâng idrâp prôa ƀă idrâp tôu mâu chêng koăng tiô khôi túa, vêa vong dêi Lếo, kuăn pơlê ƀă tơmối châ hmâng, ngăn mâu ƀai tŏn chêng, mơđah tôu tơrưng, hlŭm rơvŏng, tôu không, têa kŏng ƀa túa xuăng Lăm vông  ki vâi uăn dêi châ rơpâ rơmuăn, mơđah xâp ếo pơtâk teăn pơxá “Hương săc cao nguyên” vâ tối Mơngiơk tơbăng ngo.

Mâu ƀai xuăng “Hoa đẹp Chăm Pa”, “Sao Ken Fai”, “Sa La Vắn”, “I Kơng Đươn Đao”… Krếo tơmối veăng xuăng ƀă tơdro dêi châ tiô idrâp  prôa, chêng koăng, kơhnhon xuăng ƀă mâu rơtăm, vâi droh Lếo. Tơdrêng amê, cho mơđah xah kơxế têa pơxá chiân rơnó tô mơdrăng hiăng tâi, rơkâu kong mêi vâ tôh ăm mâu tơmeăm pêt châ rơngiâp lĕm, rĕng hŭn hlá tơpo reăng, kơ’muăn plâi.

Kố xuân cho môi tơdroăng pro mơdĭng mơhno tơdroăng vâ rơkâu pâ dêi mơngế Lếo, rơkâu pâ ăm mơngế kô xếo tah tâi mâu tơdroăng ki ôh tá mơhúa ƀă tơdah xo tơdroăng ki lĕm, hơniâp ro tung hơnăm nếo.