Leh hô̆i Pơlê Sen cho tơdroăng ki kal mơhno khôi túa lĕm ki kơnâ tung tơdroăng rêh ối hiâm mơno dêi kuăn pơlê lâp tơnêi têa tối tơdjuôm ƀă Nghệ An tối krê, vâ mơhno tơdroăng ki nhuô̆m, hiêm mơno pâ mơnê dêi tâi tâng hdroâng mơngế ƀă Pôa Hồ.

A kơmăng pơxiâm po Leh hô̆i pơlê Sen, pôa Tô Lâm, Kăn xiâm pơkuâ hnê ngăn Đảng hiăng rơtế mâu khu râ kăn pơkuâ Đảng, Tơnêi têa, Kăn pơkuâ Khu xiâm Kŏng an, khu râ kăn pơkuâ kong pơlê Nghệ An ƀă mâu kăn teăng mâ hiăng pêi pro tơdroăng pôe ché phiu ro hiăng kêi đeăng um meăn ‘’Pôa Hồ vêh pơlê lăm pôu pơlê xiâm’’.

Um meăn ‘’Pôa Hồ vêh lăm pôu pơlê xiâm’’ xŏn 12 met, châ pro ƀă hâu rơxông nếo, ƀă kŏng ngê̆ ép thủy lực nếo. Um meăn châ pro a plông kân pơlê Sen – tíu Pôa Hồ nah tơpui tơno ƀă kuăn pơlê tung 2 xôh vêh lăm pôu pơlê xiâm hơnăm 1961.