Tung  mâu hâi sôk ro dêi idrâp hơdruê ƀă rêi prôa tiô tơdrá lĕm tro vêa vong dêi kuăn ngo Lếo. Kuăn pơlê ƀă tơmối châ ngăn, tâng mâu ƀai tŏn chêng, mơđah rêi prôa T’rưng, hlŭm rơvŏng hlối têa ƀă kŏng a klŏng ƀă ngăn túa xuăng Lăm vông ki rơpâ rơmuăn, mơđah sâp ếo pơtâk teăn ƀă prế pơxá Mơngiơk tơbăng ngo. Mâu ƀai xuăng mê cho “Hoa đẹp Chăm Pa”, “Sao Ken Fai”, “Sa La Vắn”, “I Kơng Đươn Đao”… krếo tơmối veăng xuăng ƀă mâu droh rơtăm dêi Lếo.

Tơdrêng amê cho xah kơxế têa ai pơxúa chiân rơnó mơdrăng hiăng tâi, rơkâu rơnó mêi troh vâ toh rơngiâp ăm nhâ loăng ăm loăng xông dâi lĕm tơpo reăng kơ’muăn plâi. Kố xuân cho môi tơdroăng pêi pro mơhno rơkâu pâ dêi mơngế Lếo, rơkâu pâ kăn xeăng kô xếo tah tâi mâu tơdroăng ki ôh tá mơhúa ƀă tơdah xo mâu tơdroăng ki lĕm, hơniâp tung hơnăm nếo.

Troh a Dak Lak ôm hyô tung rôh leh mê, ngoh Đỗ Hoàng Việt, ối a kong pơlê Phú Yên tối:

“Hâi kố a kơdrâ drêng trâm ngăn môi tơdroăng pro mơdĭng kơxế têa dêi mơngế Lếo a rêh ối a kơpong Ƀuôn Đôn dêi kong pơlê Dak Lak.  Á hlo kơpong tơnêi Dak Lak lĕm, kố cho môi tung mâu tíu troh lăm ngăn tơ’mot  ôm hyô, malối cho tơmối lo ing kơpong kĭng têa kơxĭ Phú Yên, Bình Định”.

Mơdĭng kơxế têa ƀă ngăn túa lĕm tro cho môi tung mâu tơdroăng mơhno túa lĕm tro po a Dak Lak drêng troh leh tơbâ 50 hơnăm lâp tơnêi têa tơrŭm môi. Jâ Nguyễn Lê Thanh Thảo, ngế  tung khu tơrŭm cheăng ăm ‘nâi:

“Ngin rah xo mâu tơdroăng xah hêi ro, túa lĕm tro má môi vâ tơbleăng troh kuăn pơlê Dak Lak ƀă tơmối. Kố cho môi tung mâu tơdroăng ki kuăn pơlê ƀă tơmối kô veăng pêi ƀă xah hêi, ôh tá xê to ngăn mê ối châ veăng ro tung mâu tơdroăng tiah mê, ing mê, vâ mơjiâng tíu ki lĕm ro ƀă cho tíu  ki  lĕm ôm hyôu a Dak Lak”.

Hên tơdroăng mơno túa lĕm tro châ tơlŭm po a Tơdế pơlê kong kơdrâm Buôn Ma Thuột ƀă mâu tơring a Dak Lak.  Túa lĕm tro  hdroâng kuăn ngo Thái, kuăn ngo Lếo châ kuăn pơlê tơbleăng troh tơmối ing mâu kơchâi kâ, túa xuăng, idrâp prôa ƀă xah hêi. Tơdroăng tơbleăng mâu tơmeăm OCOP; tour Rafting vo plong tơkâ luâ xí, tour Xe kơtâu tơkâ kong kế, luâ xí; Hâi leh Khinh khí cầu xuân châ mâu khu, tíu ôm hyô tơkŭm po ƀă ki kân.

A Dak Lak hơnăm kố ối ai pơ’lêh nếo ƀă tơdroăng trâm mâ mơhno túa lĕm tro, hơdruê xuăng ƀă kong pơlê Mondulkri (kong têa Kul) ƀă tơdroăng  trâm mâ hơdruê xuăng Dak Lak - Phú Yên tơrŭm ƀă mơđah cá ngừ têa kơxĭ, tơ’mot hên kuăn pơlê ƀă tơmối veăng ngăn. Pôa Đỗ Hoàng Việt, ối a kong pơlê Phú Yên ăm ‘nâi:

“La ngiâ 2 kong pơlê tơ’mot tơdjuôm mê á vâ tâ hlo tơdroăng ki nếo tâ. Á xuân hiăng lăm troh a Buôn Ma Thuột hên rôh há la drêng kố a troh ƀă tuăn tơmiât ki tơ ê ƀă á hlo ai môi tơdroăng lâi mê gá nếo la hmâ achê ƀă pin”.